ఏపీ పాకాల మండలం పులివర్తివారిపల్లెకు పక్కనే చెత్త నుంచి సంపద తయారీ కేంద్రం వెనుక వైపున ఎస్టీ కాలనీ ఉంది. ఇక్కడ చుట్టూ కొన్ని ఎకరాల స్థలం ఖాళీగా ఉంది. ఎవరికైనా ఇళ్ల స్థలాలు ఇస్తే భవిష్యత్తులో మరింత అభివృద్ధికి అవకాశం ఉంది. సమీపంలోనే మరికొందరికి ఇళ్ల స్థలాలు ఇచ్చారు. నేల చదును కూడా సులభంగా పూర్తి అవుతుంది. గ్రామస్థులు కూడా ఇక్కడే స్థలాలు ఇవ్వమని సూచిస్తున్నా పట్టించుకోవడం లేదు.
ఇక్కడ కాకుండా గ్రామానికి ముందు భాగంలో స్థానికులు పశువులు మేపుకొనే గుట్టను ఇళ్ల స్థలాలకు ఎంపిక చేశారు. గుట్ట చదునుకు భారీగా నిధులు వెచ్చించాల్సి ఉంది. భవిష్యత్తులో మౌలిక సదుపాయాల కల్పన కష్టంగానే ఉంటుంది. గ్రామస్థుల అభీష్టానికి వ్యతిరేకంగా ఇళ్ల స్థలాలు ఇవ్వడం ద్వారా ఇక్కడుండే వారికి భవిష్యత్తులో సమస్యలు ఎదురయ్యే అవకాశం ఉంది. ఇక్కడ రాజకీయ స్వార్థం ఉందని గ్రామస్థులు చెబుతున్నారు. తనకు వ్యతిరేకంగా ఉన్న గ్రామానికి ముందు భాగంలో ఇతరులను తీసుకువచ్చి రాజకీయంగా లాభపడాలనేది ఓ ప్రజాప్రతినిధి లక్ష్యమనే విమర్శలు వస్తున్నాయి.
దారేలేని చోట స్థలాలా?
ఏపీ చంద్రగిరి మండలం నడింపల్లె నుంచి ముంగిలిపట్టు మీదుగా కొంగరవారిపల్లె వరకు రైల్వే ట్రాక్‌, దట్టమైన అటవీప్రాంతం వెంబడి ఎకరాల కొద్దీ డీకేటీ భూములను ఇళ్ల స్థలాలకు ఎంపిక చేశారు. ఇప్పటికే వందలాది ఇళ్ల స్థలాలను సిద్ధం చేసి సరిహద్దులు గుర్తించారు. ఇంకా భూములను స్వాధీనం చేసుకోవడం, చదు ను చేస్తున్నారు. ఇక్కడా రాజకీయ కోణం ఉంది.