Hyderabad Triple IT Student Research: సాంకేతిక పరిజ్ఞానం కొత్తపుంతలు తొక్కుతోంది. సినిమా రంగంలో దీని అవసరం ఇటీవల చాలా పెరిగింది. ఏ భాషలో సినిమా తీసినా.. డబ్బింగ్‌ను వారి పెదాల కదలికలకు అనుగుణంగా మార్చడం కష్టం అయిపోయింది. అలాంటి టెక్నాలజీపైన పరిశోధన చేసి విజయం సాధించారు ఈ యువకులు. 100 భాషల్లో సినిమాను ఆస్వాదించేలా సరికొత్త సాఫ్ట్‌వేర్‌ను తయారుచేశారు.
హైదరాబాద్ ట్రిపుల్ ఐటీలోని సెంటర్ ఫర్ విజువల్ ఇన్ఫర్మేషన్ టెక్నాలజీలో పీహెచ్‌డీ చేస్తున్న రుద్రభా ముఖోపాధ్యాయ, కె.ఆర్ ప్రజ్వల్ ఈ టెక్నాలజీకి తయారీకి శ్రీకారం చుట్టారు. ప్రొఫెసర్ సీవీ జవహర్, మరో ప్రొఫెసర్ వినయ్ సంబూద్రి, సీఈవో పవన్ రెడ్డిలు వీరికి తోడు కావడంతో రెండేళ్లలోనే ఈ టెక్నాలజీ కార్యరూపం దాల్చింది. ఇది పూర్తిగా కృతిమమేధ సహాయంతో పని చేస్తుంది. ఇందుకోసం వందల గంటల వీడియోలను విశ్లేషించి వేవ్ 2లిప్‌ను సృష్టించారు.
ఈ టెక్నాలిజీ వచ్చి చాలా సింపుల్. ఈ టెక్నాలిజీతో కెమెరా, మైక్ లేకుండా... మనం ఏఐ యూజ్ చేసుకుని.. మనం వీడియోస్‌ ఒక టెక్ట్‌ నుంచి తయారు చేయొచ్చు. మనం న్యూస్ పేపర్‌లో ఉన్న టెక్ట్‌ను ఒక వీడియోగా కన్వర్ట్ చేయొచ్చు. టెక్ట్‌ అంతటిని వీడియోగా మార్చడానికి ఏఐ(కృత్రిమ మేధ) ఉపయోగపడుతోంది. - పవన్ రెడ్డి, వేవ్ 2లిప్ సీఈవో
ట్రిపుల్ ఐటీలోనే రుద్రభా, ప్రజ్వల్‌లు న్యూరల్ సింక్ అనే అంకురసంస్థ స్థాపించారు. ఆ సంస్థ నుంచి వచ్చిన తొలి ప్రాజెక్టు ఈ వేవ్ 2లిప్. వాస్తవానికి ఈ టెక్నాలజీని విద్యార్థుల కోసం తయారుచేశారు. ఇంగ్లీష్‌లో చాలామంది తెలుగు విద్యార్థులు వెనుకబడిపోతున్నారు. ఎక్కువ సమాచారం ఆంగ్లంలోనే లభ్యం అవుతుండటంతో చాలామంది చదవలేకపోతున్నారు. అలాంటి విద్యార్థులు సులువుగా వారికి నచ్చిన భాషలోనే నేర్చుకునేలా కృత్రిమ మేధను ఉపయోగించి ఈ వేవ్ 2లిప్‌ను తయారు చేశారు. వేవ్ 2లిప్ టెక్నాలజీని మార్కెట్‌లోకి విడుదల చేయడంతో పలువురు సినీ దర్శకులు ఆనందం వ్యక్తం చేస్తున్నారు. అనువాద చిత్రాలకు ఈ టెక్నాలజీ బాగా దోహదపడుతుందని వారు భావిస్తున్నారు. ఇప్పటికే చాలా మంది నిర్మాతలు వేవ్ 2 లిప్ సంస్థతో ఒప్పందలు చేసుకోవడానికి చర్చలు జరుపుతున్నారు.