జీహెచ్​ఎంసీలో స్పెషల్ శానిటైజేషన్ డ్రైవ్: మేయర్

గ్రేటర్ హైదరాబాద్​లోని అన్ని సర్కిళ్లలో స్పెషల్ శానిటైజేషన్ డ్రైవ్​ను పురపాలక శాఖ మంత్రి కేటీఆర్ ప్రారంభించనున్నట్లు నగర మేయర్ బొంతు రామ్మోహన్ వెల్లడించారు. జీహెచ్ఎంసీ ప్రధాన కార్యాలయంలో మేయర్ ఉన్నతాధికారులో సమీక్ష నిర్వహించారు.

గ్రేటర్ హైదరాబాద్​లోని అన్ని సర్కిళ్లలో స్పెషల్ శానిటైజేషన్ డ్రైవ్ చేపడుతున్నట్లు నగర మేయర్ బొంతు రామ్మోహన్ తెలిపారు. స్పెషల్ శానిటైజేషన్ డ్రైవ్​ను పురపాలక శాఖ మంత్రి కేటీఆర్ ప్రారంభించనున్నట్లు వెల్లడించారు. భారీ వర్షాలు, వరద ముంపునకు గురైన ప్రాంతాల్లో పేరుకుపోయిన చెత్తచెదారం, విరిగిపడిన చెట్ల కొమ్మలు, నిర్మాణ, శిథిలాల వ్యర్థాలను పూర్తిగా తొలగించి నగరాన్ని పరిశుభ్రంగా చేసేందుకు ప్రత్యేక దృష్టి సారించాలని అధికారులకు మేయర్ స్పష్టం చేశారు.

జీహెచ్ఎంసీ ప్రధాన కార్యాలయంలో ఉన్నతాధికారులతో మేయర్ సమీక్ష నిర్వహించారు. పారిశుద్ధ్య పనులను పూర్తిచేసిన వెంటనే ఎంటమాలజి విభాగం ద్వారా క్రిమి సంహారకాల స్ప్రేయింగ్ చేయించాలని రామ్మోహన్ సూచించారు. ప్రతి కాలనీలో ఉన్న చెత్తను ఇతర వ్యర్థాలను తొలగించక ముందు, తర్వాత మొబైల్ యాప్​లో అప్​లోడ్ చేయాలని తెలిపారు.

చెత్తను ఎప్పటికప్పుడు నిర్దేశిత కేంద్రాలకు తరలించేందుకు ప్రస్తుతం ఉన్న 242 వాహనాలకు అదనంగా 536 వాహనాలను తాత్కాలికంగా తీసుకొని మొత్తం 778 వాహనాలను వినియోగించనున్నట్లు తెలిపారు. స్పెషల్ శానిటైజేషన్ డ్రైవ్​ను మానిటరింగ్ చేసేందుకు మొబైల్ యాప్​ను రూపొందించినట్లు తెలిపారు. నగరంలోని 5,733 కాలనీల్లో శానిటైజేషన్ డ్రైవ్​ను పకడ్బందీగా నిర్వహించేందుకు ప్రతి సర్కిల్​కు ఒక సూపర్ వైజర్ ఆఫీసర్​ను, 960 మంది టీమ్ లీడర్లను నియమించినట్లు తెలిపారు.

ఇదీ చూడండి:'కరోనా నియంత్రణలో వచ్చే మూడు నెలలు అత్యంత కీలకం'