క్యూఎస్ టాప్‌ యూనివర్సిటీస్‌-2021 ర్యాంకుల్లో హైదరాబాద్ ఐఐటీ, హైదరాబాద్ కేంద్రీయ విశ్వవిద్యాలయం చోటు దక్కించుకున్నాయి. ప్రముఖ పరిశోధన సంస్థ క్వాక్వారెల్లీ సైమండ్స్ (క్యూఎస్) ఏటా ప్రపంచ ర్యాంకులను ప్రకటిస్తోంది.
లండన్‌లో ప్రకటించిన తాజా ర్యాంకుల్లో ఐఐటీ బాంబే (172), ఇండియన్‌ ఇన్‌స్టిట్యూట్‌ ఆఫ్‌ సైన్స్‌ (185), ఐఐటీ దిల్లీ (193).. భారత్‌ నుంచి తొలి మూడు స్థానాల్లో నిలిచాయి. వీటికి మాత్రమే 200లోపు ర్యాంకులు దక్కాయి. ఇక హైదరాబాద్ ఐఐటీ 601-650 ర్యాంకు సాధించి దేశంలో టాప్‌-10 విశ్వవిద్యాలయాల్లో ఒకటిగా నిలిచింది. గత ఏడాది టాప్‌ ర్యాంకుల్లో హైదరాబాద్ ఐఐటీ లేదు.
గత ఏడాది 601-650 ర్యాంకుతో పదో స్థానంలో నిలిచిన హైదరాబాద్ కేంద్రీయ విశ్వవిద్యాలయం (హెచ్‌సీయూ) ఈసారి 651-700 ర్యాంకుతో 14వ స్థానానికి పడిపోయింది. అయితే హెచ్‌సీయూ వరుసగా నాలుగోసారి క్యూఎస్ ర్యాంకుల్లో చోటు దక్కించుకుంది. 2018లో 601-650, 2019లో 591-600, 2020లో 601-650 ర్యాంకులు ఈ వర్సిటీ సొంతమయ్యాయి. ఉస్మానియా విశ్వవిద్యాలయానికి ఈ ఏడాది ర్యాంకింగ్‌లో చోటు దక్కలేదు.