కానిస్టేబుల్​కు కరోనా... తోటి సిబ్బంది హైరానా

కొవిడ్​ -19 నుంచి ప్రజలను రక్షించడానికి ప్రభుత్వం విధించిన లాక్​డౌన్​ను పక్కాగా అమలు చేసేందుకు విధులు నిర్వర్తిస్తున్న పోలీసులనూ కరోనా మహమ్మారి వదల్లేదు. హైదరాబాద్​ చిక్కడపల్లి స్టేషన్​కు చెందిన ఓ కానిస్టేబుల్​కు కరోనా పాజిటివ్​ వచ్చింది.

హైదరాబాద్​ చిక్కడపల్లి పోలీస్​స్టేషన్​లో విధులు నిర్వహిస్తోన్న ఓ కానిస్టేబుల్​కు కొవిడ్​-19 సోకింది. లాక్​డౌన్ ​వేళ నిత్యం వాహనాల తనిఖీ, ఎన్ఫోర్స్​మెంట్ విధులు నిర్వర్తిస్తున్నాడు. పది రోజుల కింద ఆరోగ్యం సహకరించట్లేదని స్టేషన్​ అధికారులకు వివరించాడు. విధులకు హాజరు కాలేనని చెప్పగా.. అధికారులు అందుకు అంగీకరించారు.

నాటి నుంచి ఇంట్లో ఉండి వైద్య పరీక్షలు నిర్వహించగా.. ఆ కానిస్టేబుల్​కు కరోనా పాజిటివ్ వచ్చింది. వెంటనే గాంధీ ఆస్పత్రికి తరలించారు. పది రోజులుగా బాధితుడు విధులు నిర్వహించడం లేదని.. స్టేషన్​లోని ఇతర సిబ్బందికి ఎలాంటి కరోనా లక్షణాలు లేవని పోలీసు అధికారులు వివరించారు.

కానిస్టేబుల్​కు కరోనా పాజిటివ్ వచ్చిందన్న వార్త దవానలంలా వ్యాపించటం వల్ల పోలీస్ సిబ్బందిలో కలవరం నెలకొంది. అనునిత్యం అన్ని వర్గాల ప్రజలతో సంబంధాలు ఉండే సిబ్బందికి పాజిటివ్ రావడం వారి కుటుంబ సభ్యుల్లో తీవ్ర భయాందోళన నెలకొంది.

ఇదీ చూడండి:-లక్ష్మణరేఖ దాటకుండా కరోనాను జయిద్దాం