House Prices in Hyderabad 2023 :ఓవైపు దేశంలో ఇప్పుడిప్పుడే ఆర్థిక వ్యవస్థ కోలుకుంటోంది. మరోవైపు ప్రజల కొనుగోళ్ల శక్తి కూడా మునుపటితో పోలిస్తే పెరిగింది. ముఖ్యంగా సొంత ఇంటికి ఆదరణ పెరగడం, తక్కువ వడ్డీకే రుణాలు లభిస్తుండడం వంటి తదితర పరిణామాలతో ఇళ్ల విక్రయాలు పెరిగాయి. డిమాండ్‌కు అనుగుణంగా ఇండ్ల ధరలు సైతం పెరుగుతున్నాయి. ముఖ్యంగా మెట్రోపాలిటన్ సిటీల్లో ఇండ్ల ధరలు విపరీతంగా పెరిగాయి.
దేశ వ్యాప్తంగా ఇళ్ల ధరలకు (House Price India) సంబంధించి రెండో ఖరీదైన నగరంగా హైదరాబాద్ నిలిచింది. మొదటి స్థానంలో ముంబయి నిలిచింది. స్థిరాస్తి సేవల సంస్థ నైట్‌ ఫ్రాంక్ ఇండియా విడుదల చేసిన అఫర్డబుల్‌ ఇండెక్స్‌లో ఈ విషయాన్ని వెల్లడించింది. ఆదాయంలో ఇంటి రుణం నెలవారీ కిస్తీ (ఈఎంఐ)కి చెల్లించే నిష్పత్తి ఆధారంగా ఈ సూచీని రూపొందిస్తారు. హైదరాబాద్లో 2023లో ఇళ్ల ధరలు 11% పెరిగినట్లు ఈ నివేదిక తెలియజేసింది.
house prices have gone up in Hyderabad: 'హైదరాబాద్లోనే ఇళ్ల ధరలు పెరిగాయి'
వివిధ నగరాల్లో ఇలా :ఇక అందుబాటు ధర ఇళ్ల విషయానికొస్తే, ముంబయి కొనుగోలుదార్ల ఆదాయంలో 51% వరకు ఈఎంఐకి చెల్లించాల్సి వస్తోంది. హైదరాబాద్లో మాత్రం ఇది 30 శాతంగా ఉంది. దేశ రాజధాని దిల్లీలో 27%, బెంగళూరులో 26%, చెన్నైలో 25%, పుణెలో 24%, కోల్‌కతాలో 24%, అహ్మదాబాద్‌లో 21% మేర చెల్లింపు జరపాల్సి వస్తోంది. 2024-25లో వృద్ధి రేటు పెరగడంతో పాటు, ద్రవ్యోల్బణం అదుపులో ఉండే సూచనలు కనిపిస్తున్నాయని నైట్‌ ఫ్రాంక్ ఇండియా ఛైర్మన్, ఎండీ శిశిర్ బైజిల్ తెలిపారు. ఈ నేపథ్యంలో ఇళ్ల కొనుగోలు శక్తీ పెరుగుతుందని ఆయన వివరించారు.