వ్యాక్సినేషన్ కేంద్రాల వద్ద సిబ్బంది నిర్లక్ష్యం..!

కొవిడ్ వ్యాక్సినేషన్ కేంద్రాల వద్ద సిబ్బంది నిర్లక్ష్యం వహిస్తున్నారు. టీకా వేయించుకోవివారు కూడా వేయించుకున్నట్లుగా చరవాణికి సమాచారం అందిస్తున్నారు. తాము టీకా తీసుకోలేదని వ్యాక్సిన్ కేంద్రాల వద్దకు వెళ్లిన వారికి సమయం మించిపోయిందంటూ సమాధానం చెప్పి అక్కడి నుంచి పంపించేస్తున్నారు.

తార్నాకలో ఉండే ఇద్దరు ఉన్నతోద్యోగులు రంగారెడ్డి జిల్లా పరిధిలోని ఓ పీహెచ్‌సీలో రెండో డోస్‌ కోసం స్లాట్‌ బుక్‌ చేసుకున్నారు. సుమారు 50 కి.మీలు ప్రయాణించి మధ్యాహ్నం 12 గంటలకు అక్కడికెళ్తే సమయం మించిపోయిందంటూ తిప్పి పంపించారు. తర్వాత ‘వాక్సినేషన్‌ కంప్లీటెడ్‌’ అంటూ ఎస్‌ఎంఎస్‌ రావడంతో ఆ ఇద్దరు కంగుతిన్నారు. మరుసటి రోజు మళ్లీ వెళ్లినా సిబ్బంది ఒప్పుకోలేదు. ఈ ఇద్దరే కాదు.. చాలా మంది ఈ తరహా ఇబ్బందులను ఎదుర్కొన్నారు.

చివరి నిమిషంలో హడావుడిగా...

గ్రేటర్‌ పరిధిలోని వ్యాక్సినేషన్‌ సెంటర్లలో స్లాట్స్‌ దొరకడం లేదు. కాస్త దూరమైనా సరే.. తప్పనిసరి పరిస్థితుల్లో నగరవాసులు రంగారెడ్డి జిల్లా పరిధిలోని శివారు ప్రాంతాల్లో బుక్‌ చేసుకుంటున్నారు. కొన్ని సెంటర్లలోని డాటా ఎంట్రీ ఆపరేటర్ల తీరు ఇబ్బంది కలిగిస్తుంది. ఆరోజు రిజిస్ట్రేషన్‌ చేసుకున్న వ్యక్తులంతా వ్యాక్సిన్‌ తీసుకోకపోయినా తీసుకున్నట్లు ఆన్‌లైన్‌లో నమోదు చేస్తున్నారు. ఆ స్థానంలో పరిచయస్థులకు సూది మందు వేయిస్తున్నారనే ఆరోపణలున్నాయి.

స్లాట్‌ రద్దు అంటూ సందేశాలు

స్లాట్‌ బుక్‌ చేసుకున్నా సమయానికొచ్చేసరికి రద్దవుతుండటంతో నగరవాసులు ఆందోళనకు గురవుతున్నారు. మళ్లీ దొరకుతుందో లేదోనంటూ కంగారు పడుతున్నారు. ఈ శనివారం నాటికి బుక్‌ చేసుకున్న స్లాట్‌ రద్దు అయ్యిందంటూ అనేక మందికి శుక్రవారం సంక్షిప్త సందేశాలు రావడంతో సంబంధితులు అవాక్కయ్యారు. మరోసారి స్లాట్‌బుక్‌ చేసుకోవడానికి అవకాశం ఉంటుందా లేదా అన్న దానిపై అధికారులు సమాధానం ఇవ్వడం లేదు.

ఇదీ చదవండి:డ్రోన్ల ద్వారా కొవిడ్‌ మందుల పంపిణీ.. మూడో వారం నుంచి ప్రారంభం.!