జవాన్ పరుశురాం మృతి పట్ల సంతాపం వ్యక్తం చేసిన దత్తాత్రేయ

జమ్ము కశ్మీర్​లో లడఖ్-లేహ్ వద్ద విధులు నిర్వహిస్తున్న తెలంగాణకు చెందిన జవాన్ పరుశురాం మృతిపై హిమాచల్​ప్రదేశ్ గవర్నర్ బండారు దత్తాత్రేయ సంతాపం తెలిపారు. పరశురాం సతీమణి శాంతిని ఫోన్​లో పరామర్శించారు.

మహబూబ్​నగర్ జిల్లా గండీడ్ మండలం గువ్వని కుంట తండాకు చెందిన జవాన్ పరుశురాం(30) విధి నిర్వహణలో ఉన్న సమయంలో కొండా చరియలు విరిగిపడటంతో మృతి చెందాడు. జవాన్​ మృతి పట్ల హిమాచల్​ప్రదేశ్ గవర్నర్ బండారు దత్తాత్రేయ సంతాపం తెలిపారు. పరుశురాం సతీమణి శాంతిని ఫోన్​లో పరామర్శించారు.

పరశురాం ఆత్మకు శాంతిని చేకూరాలని.. ఈ కష్ట సమయాన వారి కుటుంబ సభ్యులకు మనోధైర్యాన్ని ప్రసాదించాలని భగవంతుణ్ణి ప్రార్థిస్తున్నట్లు తెలిపారు. వారి కుటుంబ సభ్యులను ప్రభుత్వం అన్నివిధాలా ఆదుకుంటుందని బండారు దత్తాత్రేయ చెప్పారు.

ఇదీ చదవండి:తాజా తాజా కూరగాయలు... ఇంటి వద్దే పండించి తినేయరూ...!