ఒక్క నెలలోనే రూ.1,650 కోట్ల మద్యం తాగేశారు

రాష్ట్రంలో మంచి నీటికి సమస్య ఉంటుంది కానీ మందు సమస్య ఉండదనిపిస్తుంది మద్యం అమ్మకాలు చూస్తుంటే. తెలంగాణలో మద్యాన్ని మంచినీళ్లలో తాగేస్తున్నారు మందుబాబులు. ఒక్క ఆక్టోబరు నెలలోనే ఏకంగా రూ.1,650 కోట్ల విలువైన మద్యాన్ని  తాగేశారు.

తెలంగాణలో మందుబాబులు తమ ప్రతాపాన్ని చూపుతున్నారు. గొడవ చేయడంలో కాదు మందు తాగడంలో... అవును మీరు విన్నది నిజమే.. తెలంగాణలో ఒక్క అక్టోబరు నెలలోనే రూ.1,650 కోట్ల విలువైన మద్యాన్ని మంచినీళ్లలా తాగేశారు. 26.74లక్షల కేసుల లిక్కర్‌, 38.29లక్షల కేసుల బీరు అమ్ముడు పోయినట్లు అబ్కారీ శాఖ లెక్కలు వెల్లడిస్తున్నాయి. రోజుకు సగటున రూ.53 కోట్లు విలువైన మద్యం రాష్ట్రంలో అమ్మకాలు జరిగినట్లు ఎక్సైజ్‌ అధికారులు తెలిపారు. సెప్టెంబరు నెలాఖరు నాటికే ఎక్సైజ్‌ లైసెన్స్​ల గడువు ముగిసినప్పటికీ... కొత్త విధానం అమలుకు కొంత సమయం పట్టడం వల్ల.. నెల రోజులుపాటు పాత లైసెన్స్​లనే పొడిగించారు.

రంగారెడ్డిలో అత్యధికం

ఆ నెల రోజుల్లో... అత్యధికంగా మద్యాన్ని తాగినట్లు ఎక్సైజ్‌ శాఖ గణాంకాలు చెబుతున్నాయి. జిల్లాల వారీగా తీసుకుంటే రంగారెడ్డి అత్యధికంగా రూ.217 కోట్లు, హైదరాబాద్‌ రూ.206 కోట్లు, మేడ్చల్‌ మల్కాజిగిరి రూ.187 కోట్ల మద్యం విక్రయాలు జరిగాయి. నల్గొండ, వరంగల్‌, ఖమ్మం జిల్లాల్లో దాదాపు 80 కోట్ల విలువైన మద్యం విక్రయాలు జరిగినట్లు ఎక్సైజ్‌ అధికారులు తెలిపారు. మిగిలిన జిల్లాలల్లో రూ.20 కోట్లకు తక్కువ కాకుండా 70 కోట్ల వరకూ మద్యం అమ్మకాలు జరిగాయని వివరించారు.

ఇవీ చూడండి: ఆమెను చంపితేనే "సుఖం"..!