కరోనా వేళ వృద్ధులపై 'హెల్పేజ్ ఇండియా' సర్వేలో నమ్మలేని నిజాలు!

కరోనా మనిషి జీవితాన్ని అతలాకుతలం చేస్తోంది. పసిబిడ్డ నుంచి పండు ముసలి వరకూ అందరినీ వణికిస్తోంది. వైరస్​ ధాటికి తట్టుకోలేక రాలిపోతున్న పండుటాకులు కొన్నైతే...లాక్‌డౌన్‌తో ఇళ్లల్లో ఉండలేని దయనీయత మరికొందరిది! అనారోగ్యంతో మంచనాపడ్డ వారి పరిస్థితి మరీ దారుణంగా తయారైంది. ప్రముఖ స్వచ్ఛంద సంస్థ హెల్పేజ్ ఇండియా 21 రాష్ట్రాల్లో నిర్వహించిన సర్వేలో నమ్మలేని నిజాలు వెలుగులోకి వచ్చాయి.

కరోనా వైరస్‌కు ప్రపంచ దేశాలు అతలాకుతలం అవుతున్నవేళ... 60ఏళ్ల నుంచి 90 ఏళ్లుపైబడినవారు కరోనా కాటుకు బలవుతున్నాయి. నమోదవుతున్న కేసులు, మరణాల్లో వయోవృద్ధుల సంఖ్య ఎక్కువగా ఉండటంతో... మిగతా వారిలో తెలియని ఆందోళన వెంటాడుతోంది.

ఈ నేపథ్యంలో ప్రముఖ స్వచ్ఛంద సంస్థ హెల్పేజ్ ఇండియా లాక్‌డౌన్ సమయంలో... 21 రాష్ట్రాల్లోని వృద్ధుల జీవితాలపై జాతీయస్థాయిలో సర్వే నిర్వహించింది. పట్టణ, గ్రామీణ ప్రాంతాల్లో 6 వేల మంది వృద్ధులను నమూనాగా తీసుకొని చేపట్టిన సర్వేలో... 53 శాతం మంది పురుషులు, 47 శాతం మంది మహిళలపై కోవిడ్ ప్రభావాన్ని తెలుసుకున్నారు. ఆ సర్వేలో మునపటి కంటే అత్యంత దయనీయ స్థితిలో పండుటాకులు మగ్గుతున్నారని తేలింది.

సర్వేలో ఏమి తేలిందంటే...

వృద్ధుల జీవన స్థితి, ఆరోగ్య పరిస్థితి, కుటుంబ పోషణ, సామాజిక స్థితి, అవసరాలపై నిర్వహించిన సర్వే ప్రకారం... ప్రభుత్వం, మీడియా వల్ల కరోనా వైరస్‌పై అవగాహన కలిగిందని 91 శాతం మంది తెలిపారు. 71 శాతం మంది వృద్ధులు లాక్‌డౌన్ కారణంగా తమ కుటుంబసభ్యుల ఉపాధి దెబ్బతిందని వాపోయారు. వారిలో 61 శాతం గ్రామీణ ప్రాంతాల్లో ఉపాధి కోల్పోయి పూట గడవడమే కష్టంగా మారిందని తెలిపారు. పట్టణ ప్రాంతాల్లో 39 శాతం మంది వృద్ధులది ఇదే బాధ. నిత్యావసర సరకులు, మందుల కోసం తీవ్ర ఇబ్బందులు పడ్డట్లు... గ్రామీణ ప్రాంతాల్లో 84 శాతం మంది వృద్ధులు ఆవేదన వ్యక్తం చేయగా.. పట్టణ ప్రాంతంలోనూ 71 శాతం మంది తమ సమస్యలను వ్యక్తపరిచారు.

దీర్ఘకాలిక వ్యాధులతో బాధపడేవారిలో 62 శాతం మంది.. లాక్‌డౌన్ ఆరోగ్యంపై తీవ్ర ప్రభావం చూపిందని వెల్లడించారు. సమయానికి మందులు దొరకక, ఆస్పత్రులకు వెళ్లలేక... 42 శాతం మంది ఆరోగ్యం మరింత క్షీణించినట్లు తెలిపారు. ఒంటరిగా ఉండటం వల్ల తెలియని భయాందోళన వెంటాడిందని 38 శాతం ... పనిలేకపోవడం, ఆర్థికంగా ఇబ్బందిపడటం వల్ల 34 శాతం.., వ్యాధి నిరోధక శక్తి తక్కువగా ఉండటం వల్ల 12 శాతం మంది... ఆందోళనకు గురైనట్లు తెలిపారు. పింఛన్ తీసుకునేందుకు కూడా ఇబ్బంది పడినట్లు 60 శాతం మంది వృద్ధులు చెప్పారు. మరో 50 శాతం మంది వృద్ధులు.... ఆస్పత్రులకు వెళ్లలేక ఇబ్బందులు పడుతున్నామని, ఇళ్ల వద్దనే వైద్యపరీక్షలు నిర్వహించి మందులు ఇవ్వాలని అభిప్రాయపడ్డారు.

వృద్ధులకు అండాగా..

వయోవృద్ధుల సంరక్షణపై 42 ఏళ్లుగా హెల్పేజ్ ఇండియా సంస్థ పనిచేస్తోంది. అనాథలైన వారికి ఆశ్రయం కల్పించడం, అనారోగ్యంతో బాధపడేవారికి మొబైల్ హెల్త్ కేర్ ద్వారా సాంత్వన కలిగిస్తోంది. ఇందుకోసం 160 మొబైల్ హెల్త్ కేర్ యూనిట్లు నిరంతరం పనిచేస్తున్నాయి. వివిధ పట్టణాలు, గ్రామాల్లో కలిపి 55 వేల మంది వృద్ధులతో.. స్వయం సహాయక సంఘాలను ఏర్పాటు చేసింది. భవిష్యత్ తరాలకు పెద్దల గొప్పతనాన్ని వివరిస్తూ... విద్యాసంస్థల్లో అవగాహన సదస్సులు నిర్వహిస్తోంది.

ఇదీ చదవండి:లాక్‌డౌన్‌పై సీఎం కేసీఆర్‌ సందేహానికి ప్రధాని స్పష్టత