మెట్రోస్టేషన్‌ వద్ద ట్రాఫిక్​లో ప్రభుత్వ అధికారికి గుండెపోటు.. పోలీసులేంచేశారంటే

హైదరాబాద్‌ నాంపల్లి మెట్రోస్టేషన్‌ వద్ద ట్రాఫిక్ జాంలో చిక్కుకున్న ప్రభుత్వ అధికారికి గుండెపోటు రాగా.. హుటాహుటిన పోలీసులు ఆస్పత్రికి తరలించారు. సకాలంలో ఓ వ్యక్తి ప్రాణాలు కాపాడిన పోలీసు సిబ్బందిపై నెటిజన్లు హర్షం వ్యక్తం చేస్తున్నారు.

హైదరాబాద్ నాంపల్లి మెట్రో స్టేషన్ సమీపంలో ట్రాఫిక్ జాంలో ఇరుక్కుపోయిన ఓ వాహనదారుడికి గుండెపోటు వచ్చింది. ద్విచక్ర వాహనంపై వెళ్తుండగా ఒక్కసారిగా కిందపడిపోవడంతో... అక్కడే భాజపా పార్టీ రాష్ట్ర కార్యాలయం వద్ద బందోబస్త్​లో ఉన్న పోలీసు కానిస్టేబుళ్లు శివరాజ్, అశోక్ స్థానికుల సహాయంతో పక్కనే ఉన్న కేర్ ఆసుపత్రికి హుటాహుటిన తరలించారు.

గుండె పోటు వచ్చిన వ్యక్తి ఎస్.విజయ్ కుమార్... ఏజీ కార్యాలయంలో ఆడిట్ అధికారిగా పనిచేస్తున్నాడు. సకాలంలో ఆసుపత్రికి చేర్చడంతో ప్రాణాపాయం తప్పింది. ప్రస్తుతానికి ఆసుపత్రిలో చికిత్స పొందుతున్న విజయ్ కుమార్ ఆరోగ్యం నిలకడగా ఉంది. నాకు ఎందుకులే అనుకోకుండా... సకాలంలో ఓ వ్యక్తి ప్రాణాలు కాపాడిన పోలీసు సిబ్బందిపై నెటిజన్లు హర్షం వ్యక్తం చేస్తున్నారు.

ఇదీ చదవండి: KTR: 'ఎవరూ రాజీనామా చేయాల్సిన పనిలేదు.. అక్కడ కూడా దళితబంధు ఇస్తాం'