అంతరాయం లేకుండా వైద్య సేవలు: ఈటల

కరోనా సమయంలోనూ క్యాన్సర్, డయాలసిస్ సేవలు అంతరాయం లేకుండా అందించామని వైద్య ఆరోగ్య శాఖ మంత్రి ఈటల రాజేందర్​ అన్నారు. మెడికల్ కౌన్సిల్ ఆఫ్ ఇండియా విధి విధానాలకు అనుగుణంగా అన్ని ప్రభుత్వ వైద్య కళాశాలల్లో మౌలిక వసతులు కల్పించాలని అధికారులను ఆదేశించారు. మెడికల్ సీట్ల సంఖ్య పెరిగిన నేపథ్యంలో అధికారులతో సమీక్ష నిర్వహించారు.

మెడికల్ కౌన్సిల్ ఆఫ్ ఇండియా విధి విధానాలకు అనుగుణంగా అన్ని ప్రభుత్వ వైద్య కళాశాలల్లో మౌలిక వసతులు ఉండేలా చూడాలని వైద్య ఆరోగ్య శాఖ మంత్రి ఈటల రాజేందర్​ అధికారులను ఆదేశించారు. రాష్ట్రంలో మెడికల్ సీట్ల సంఖ్య పెరిగిన నేపథ్యంలో ప్రభుత్వ మెడికల్ కాలేజీల ప్రిన్సిపల్స్, సూపరింటెండెంట్లతో సమీక్ష నిర్వహించారు. కరోనా సమయంలోనూ క్యాన్సర్, డయాలసిస్ లాంటి జబ్బులున్న రోగులకు ఎలాంటి అంతరాయం లేకుండా వైద్య సేవలు అందించామన్నారు.

ప్రాథమిక ఆరోగ్య కేంద్రం నుంచి వైద్య కళాశాల వరకు అన్ని ఆస్పత్రులు ఒక వారధిలాగా పని చేయాలన్న ఈటల... చిన్న చిన్న జబ్బులకు రోగులు గాంధీ లాంటి దవాఖానాలకు రాకుండా... ప్రాథమిక ఆరోగ్య కేంద్రం, ఏరియా, జిల్లా ఆస్పత్రుల్లో చికిత్స పొందేలా ఏర్పాట్లు చేస్తున్నట్లు తెలిపారు. కేవలం అత్యవసర, క్లిష్ట సమస్యలకి మాత్రమే గాంధీ, ఉస్మానియా, ఎంజీఎంకు పంపించాలని సూపరింటెండెంట్లను మంత్రి కోరారు.

అన్ని ఆస్పత్రుల పరిసరాలను పరిశుభ్రంగా ఉంచాలని, శానిటేషన్ ఇబ్బందులు తలెత్తకుండా చూడాలన్నారు. ఆరోగ్య శ్రీ సేవలు మరింత మెరుగుపరచాలని సూచించిన ఈటల... కొవిడ్​ సమయంలో పని చేసిన వైద్య కళాశాలల సిబ్బందిని అభినందించారు. ఈ సమావేశంలో వైద్య ఆరోగ్య శాఖ కార్యదర్శి రిజ్వి, కుటుంబ సంక్షేమ శాఖ కమిషనర్ వాకాటి కరుణ, డైరెక్టర్ ఆఫ్ మెడికల్ ఎడ్యుకేషన్ డా.రమేశ్​ రెడ్డి, టీఎస్ ఎంఐడీసీ ఎండీ చంద్రశేఖర్ రెడ్డి పాల్గొన్నారు.

ఇదీ చదవండి:పీఎస్‌ఎల్‌వీ-సి50 ప్రయోగం విజయవంతం