GST: జీఎస్టీ వసూళ్లు..సెప్టెంబరులో 25శాతం పైగా వృద్ధి

ఇరు తెలుగు రాష్ట్రాల్లో సెప్టెంబరు నెల జీఎస్టీ(GST) గణాంకాలు విడుదలయ్యాయి. తెలంగాణలో 25శాతం, ఆంధ్రప్రదేశ్​లో 21శాతం చొప్పున జీఎస్టీ వసూళ్లు పెరిగినట్లు కేంద్ర ఆర్థిక శాఖ వెల్లడించింది.

సెప్టెంబరు నెలలో రాష్ట్రంలో జీఎస్టీ(GST) వసూళ్లు 25శాతం వృద్ధి చెందినట్లు కేంద్ర ఆర్థిక శాఖ స్పష్టం చేసింది. గత నెలలో తెలంగాణకు సంబంధించి జీఎస్టీ(GST) ఆదాయం రూ.1,17,010 కోట్లుగా నమోదైనట్లు తెలిపింది. ఇందులో సీజీఎస్టీ(CGST) కింద రూ.20,578 కోట్లు, ఎస్​జీఎస్టీ(SGST) రూ.26,767 కోట్లు, ఐజీఎస్టీ(IGST) రూ.60,911 కోట్లు వసూలైనట్లు వెల్లడించింది. ఐజీఎస్టీ(IGST) నుంచి సీజీఎస్టీ(CGST) కింద రూ.28,812 కోట్లు, ఎస్​జీఎస్టీ(SGST) కింద రూ. 24,140 కోట్లు చొప్పున సర్దుబాటు చేసింది.

రెగ్యులర్ సెటిల్‌మెంట్ల తర్వాత కేంద్ర ఆదాయం కింద సీజీఎస్టీ(CGST) రూ.49,390 కోట్లు, రాష్ట్ర ఆదాయం కింద ఎస్​జీఎస్టీ(SGST) రూ.50,907 కోట్లు వసూళ్లు నమోదయ్యాయి. గతేడాది ఇదే నెలలో వచ్చిన జీఎస్టీ(GST) రాబడులను బేరీజు వేస్తే 23 శాతం అధికంగా వచ్చినట్లు ఆర్థిక శాఖ స్పష్టం చేసింది. రాష్ట్రంలో గతేడాది సెప్టెంబరు​లో రూ.2,796 కోట్లు రాగా ఈ సెప్టెంబరులో రూ.3,494 కోట్లు ఆదాయం వచ్చింది.

మరోవైపు ఆంధ్రప్రదేశ్​లో కూడా జీఎస్టీ(GST) వసూళ్లు 21 శాతం వృద్ధి చెందాయి. గత ఏడాది సెప్టెంబరులో రూ.2,141 కోట్లు రాగా ఈ ఏడాది రూ. 2,595 కోట్లు వచ్చినట్లు ఆర్థిక శాఖ స్పష్టం చేసింది.

ఇదీ చదవండి:Gandhi Jayanti: బాపూఘాట్‌లో గాంధీ జయంతి వేడుకలు.. నివాళి అర్పించిన గవర్నర్‌, స్పీకర్‌, మంత్రులు