గ్రేటర్లో కొవిడ్ మృతులకు ఉచితంగా అంతిమయాత్ర రథాలను కేటాయిస్తూ సోమవారం సర్కారు కీలక నిర్ణయం తీసుకుంది. రాష్ట్ర పురపాలక శాఖ మంత్రి కేటీఆర్ ఆదేశాల మేరకు ఈ సేవలను అందుబాటులోకి తెచ్చినట్లు పురపాలక శాఖ కార్యదర్శి అర్వింద్‌కుమార్‌ ప్రకటించారు. ప్రైవేటు వాహనదారులు మృతదేహాల తరలింపునకు భారీగా వసూలు చేస్తుండటంతో, అడ్డుకట్ట వేసేందుకు ఈ నిర్ణయం తీసుకున్నామని పేర్కొన్నారు. ఇంట్లో గానీ, ఏ ఆసుపత్రుల్లోనైనా కరోనాతో చనిపోతే అంతిమయాత్రకు వాహనాలు ఉచితంగా పంపిస్తామన్నారు. ఇంటివద్ద, ప్రైవేటు వైద్య శాలల్లో అయితే నిర్ణీత ధరలు వసూలు చేయనున్నారు.
ఆరు జోన్లలో సేవలు
హైదరాబాద్లో 6 జోన్లకు కలిపి 14 వాహనాలను అందుబాటులోకి తెచ్చామన్నారు. అవసరమైనవారు జోన్లవారీగా ఇన్‌ఛార్జులకు ఫోన్‌ చేసి సేవలను పొందాలని సూచించారు. ప్రభుత్వ ఆస్పత్రుల్లో కొవిడ్ మృతులకు అంతిమ యాత్ర రథంతోపాటు అంత్యక్రియలూ ఉచితమేనని గుర్తుచేశారు. పురపాలక శాఖ కార్యదర్శి సోమవారం ఈఎస్‌ఐ, అంబర్‌పేట, పంజాగుట్ట, బన్సీలాల్‌పేట శ్మశానవాటికలను సందర్శించారు. అధికారులు, సిబ్బందితో మాట్లాడి, పౌరులకు సమస్యలు తలెత్తకుండా చూడాలని ఆదేశించారు. ఉచిత అంతిమ యాత్ర రథం, అంత్యక్రియల విషయమై ఎలాంటి ఫిర్యాదులున్నా 24 గంటలపాటు పనిచేసే జీహెచ్‌ఎంసీ కంట్రోల్‌రూం నంబరు 040-2111 1111ను సంప్రదించాలని ప్రజలను కోరారు.
జోన్లవారీ ఇంఛార్జుల ఫోన్‌ నంబర్లు :
* ఎల్బీనగర్‌: కుమార్ 9100091941, వెంకటేశ్‌ 9701365515
* చార్మినార్‌: నాయక్‌ 9440585704, బాల్‌రెడ్డి 9849907742