క‌రోనా సంక్షోభంలో పేదల క‌డుపు నింపేందుకు సర్కారు సిద్ధమైంది. పేదల ఆకలి తీర్చాలన్న ముఖ్యమంత్రి కేసీఆర్ ఆదేశాల మేరకు జూన్, జులై నెలలకు కలిపి ప్రతి ఒక్కరికి 15 కిలోల ఉచిత బియ్యం అందించనుంది. లాక్‌డౌన్‌ కొనసాగుతున్నందున పేదలకు ఉపాధి దొరికే పరిస్థితులు లేకపోవడంతో ప్రతి నెలా అందించే బియ్యానికి 15 కిలోలు అదనంగా ఇవ్వనుంది. ఇందులో జూన్ నెలలో 10 కిలోలు ఉచితంగా ఇచ్చి.. మిగతా 5 కిలోలు జులైలో ఇవ్వనుంది.
జూన్‌లో అందించే రేష‌న్‌లో కేంద్ర ప్రభుత్వం గుర్తించిన 53 లక్షల 56 వేల కార్డులకు అందించే 15 కిలోలకు తోడు రాష్ట్ర ప్రభుత్వం 33 లక్షల 86 వేల కార్డుదారులకు 15 కిలోలు ఎలాంటి పరిమితులు లేకుండా ఉచితంగా అందించాల‌ని నిర్ణయించింద‌ని పౌర సరఫరాల శాఖ మంత్రి గంగుల కమలాకర్‌ వెల్లడించారు. రేషన్‌ కార్డులో ఎంత మంది పేర్లు ఉంటే ఆ కుటుంబ సభ్యులందరికీ 15 కిలోల చొప్పున, కేంద్రం ప‌రిధిలోకి రాని ల‌బ్ధిదారుల‌కు సైతం ఈ ప్రయోజ‌నం చేకూరుతుందని తెలిపారు.