రక్తంలో చక్కెర స్థాయులను నియంత్రణలో ఉంచడానికి మధుమేహులు వినియోగించే ‘ఇన్సులిన్‌’ ధరను తగ్గించే దిశగా ప్రపంచ ఆరోగ్య సంస్థ(డబ్ల్యూహెచ్‌ఓ)దృష్టిపెట్టింది. ప్రపంచంలో ఇన్సులిన్‌ అమ్మకాల్లో కొన్ని ఉత్పత్తి సంస్థలకే గుత్తాధిపత్యం, ధరలు భారీగా ఉండటాన్ని గుర్తించింది. మరిన్ని ఇన్సులిన్‌ ఉత్పత్తి సంస్థలను ప్రోత్సహించాలని నిర్ణయించింది.
ఆదాయంలో సుమారు 22 శాతం
నేడు ప్రపంచ మధుమేహ దినాన్ని పురస్కరించుకుని తొలిసారిగా ఈ తరహా ప్రయోగాత్మక చొరవకు శ్రీకారం చుట్టినట్లుగా బుధవారం ప్రపంచ ఆరోగ్య సంస్థ ప్రకటించింది. దారిద్య్రరేఖకు దిగువనున్న కుటుంబాల్లోని మధుమేహులు తమ నెల ఆదాయంలో సుమారు 22 శాతం ఇన్సులిన్‌ కోసమే ఖర్చుపెడుతున్నట్లుగా డబ్ల్యూహెచ్‌ఓ వెల్లడించింది. సాధారణంగా రెండు రకాల ఇన్సులిన్‌లను మధుమేహులు వినియోగిస్తున్నారు. మొదటి రకం(హ్యూమన్‌ ఇన్సులిన్‌) వినియోగించే వారు ప్రపంచంలో దాదాపు 61 శాతం మంది ఉండగా, రెండో రకం (అనలాగ్‌ ఇన్సులిన్‌) వినియోగించేవారు 13 శాతం మంది మాత్రమే.