దేశంలో కరోనా నివారణలో హైదరాబాద్ జీఎంఆర్ ఎయిర్ కార్గో కీలక పాత్ర పోషిస్తోంది. కరోనాతో యుద్ధానికి తన వంతు కృషి చేస్తోంది. తాజాగా అమెరికాలోని డల్లాస్ నుంచి ఆక్సిజన్ కాన్సంట్రేటర్ రూపంలో కోవిడ్ రిలీఫ్ మెటీరియల్‌ను అందుకుంది. సుమారు 2352 కిలోల బరువున్న మొత్తం 8 ఆక్సిజన్ కాన్సంట్రేటర్లు హైదరాబాద్ విమానాశ్రయానికి వచ్చాయి.
కరోనాపై పోరాటంలో జీఎంఆర్ ఎయిర్ కార్గో.. - కరోనా నివారణకు జీఎంఆర్ హైదరాబాద్ ఎయిర్ కార్గో సేవలు
దేశంలో ఓ వైపు కరోనా విజృంభణ కొనసాగుతుంటే.. మరోవైపు వైరస్ నివారణకు ప్రభుత్వం పలు చర్యలు చేపడుతోంది. విదేశాల సహకారంతో మహమ్మారి నిర్మూలనకు కృషి చేస్తోంది. ఈ నేపథ్యంలో హైదరాబాద్లోని జీఎంఆర్ ఎయిర్ కార్గో కొవిడ్ నివారణకు విశేష సేవలందిస్తోంది. తమ విమానాల ద్వారా విదేశాల నుంచి వైద్య సంబంధిత సామగ్రిని దిగుమతి చేసుకుంటూ.. తన వంతు పాత్ర పోషిస్తోంది.
కరోనా నివారణకు జీఎంఆర్ సేవలు
భారత్లో కరోనా రెండో దశ ప్రారంభమైన నాటి నుంచి ప్రతి క్షణం అప్రమత్తంగా ఉంటూ అన్ని రాష్ట్రాలకు జీఎంఆర్ తన సేవలను అందిస్తోంది. కొవిడ్ టీకాలు, వైద్య పరికరాలు, పీపీఈ కిట్లు, మాస్కులు, శానిటైజర్ల రవాణాను జీఎంఆర్ సజావుగా నిర్వహించింది. ఈ ఏడాది జనవరి నుంచి ఇప్పటివరకు 100 టన్నులకు పైగా కొవిడ్ వ్యాక్సిన్లను హైదరాబాద్ నుంచి ఇతర రాష్ట్రాలకు దిగ్విజయంగా పంపిణీ చేసింది.