వీధి కుక్కలను పెంచుకోవాలనుకుంటే.. రిజిస్ట్రేషన్​, లైసెన్స్ ఫ్రీ

GHMC action against stray dogs : వీధి కుక్కల ప్రమాదాల నుంచి శాశ్వత పరిష్కారానికి మహానగర పాలక సంస్థ చర్యలు చేపట్దింది. ఇందుకోసం అఖిలపక్ష కమిటీ ఏర్పాటు చేయనుంది. శునకాల సమస్య పరిష్కారానికి సూచనలు, సలహాలు ఇవ్వాలని కోరుతున్నారు. ఇటీవల కాలంలో శునకాల స్వైర విహారం కారణంగా అనేక ఇబ్బందులు ఎదురవుతున్నాయి. కొందరు ఇళ్ల నుంచి తమ పిల్లలను బయటకు పంపించాలంటేనే ఆందోళన చెందుతున్నారు. దీంతో జీహెచ్ఎంసీ వీధి కుక్కల సమస్య పరిష్కారానికి నడుం బిగించింది.

GHMC action against stray dogs : హైదరాబాద్​లో వీధి కుక్కల బెడద అరికట్టేందుకు జీహెచ్‌ఎంసీ కార్యాచరణ చేపట్టేందుకు సిద్దమవుతోంది. సమస్య పరిష్కారానికి అఖిలపక్ష కమిటీ ఏర్పాటు చేయడంతో పాటు స్వచ్ఛంద సంస్థలు, ప్రజాప్రతినిధులు, అధికారులు, జంతు ప్రేమికులు ముందుకు రావాలని మహానగర పాలక సంస్థ కోరుతోంది. ప్రధానంగా శానిటేషన్‌ వర్కర్స్‌ నుంచి ఏఎంఓహెచ్‌, డీసీలు కార్పొరేటర్లు కూడా సమస్య పరిష్కారంలో బాధ్యత తీసుకోవాలని మేయర్‌ గద్వాల్‌ విజయలక్ష్మి కోరారు.

కుక్కలను పట్టుకోడాని వాహనాలు పెంపు: వీధి కుక్కల నియంత్రణకు ఎనిమల్ బర్త్ కంట్రోల్, స్టెరిలైజేషన్, వాక్సినేషన్ వేయడానికి ఇప్పటికే నగర పాలక సంస్థ చర్యలు చేపట్టింది. దీంతో పాటుగా కుక్కలను పట్టుకోవడానికి ప్రస్తుతం ఉన్న 30 వాహనాలతో పాటు అదనంగా మరో 20 వాహనాలను ఏర్పాటు చేసి ఒక్కో వాహనానికి ఐదుగురు సిబ్బందిని ఔట్ సోర్సింగ్ పద్దతిలో నియమించి కుక్కల బెడద నివారణకు ప్రయత్నాలు చేస్తున్నారు.

నిర్లక్ష్యంగా ఉంటే కఠన చర్యలు తప్పవు: ప్రతి రోజు 150 కుక్కలకు జరుగుతున్న స్టెరిలైజేషన్ ప్రక్రియను ఇక నుంచి నూతన పరిజ్జానంతో 400 నుంచి 450 కుక్కలకు స్టెరిలైజేషన్ చేయడానికి ఏర్పాట్లు చేస్తున్నారు. వ్యర్ధాలను కూడా వెంటనే తొలగించేందుకు చర్యలు తీసుకుంటున్నారు. ఈ విషయంలో అలసత్వం, నిర్లక్ష్యం వహించినా ఉపేక్షించేదిలేదని మేయర్ హెచ్చరించారు. కార్పొరేటర్​కు తెలియకుండా అవగాహన కార్యక్రమాన్ని నిర్వహించవద్దని, ఒకవేళ ఎలాంటి సమాచారం ఇవ్వకుండా అవగాహన కార్యక్రమం నిర్వహిస్తే వారిపై చర్యలు తీసుకుంటామని తెలిపారు.

సిబ్బంది పెంచి.. కమిటీ ఏర్పాటు: ప్రతి సంవత్సరం కుక్కల గణన కూడా చేస్తామని అన్నారు. కార్పొరేటర్లు జిహెచ్ఎంసీ పరిధిలో ఉన్న 5 జంతు సంరక్షణ కేంద్రాలను సందర్శించి అక్కడ అవసరమైన సదుపాయాలు సూచించాలని అవసరమైతే తగిన చర్యలు తీసుకోవాలని అన్నారు. ఒప్పంద పద్దతిలో వైద్యులను నియమించి, ఎనిమల్ బర్త్ కంట్రోల్ ఆపరేషన్లు, రేబీస్ టీకాలపై నియంత్రణ కమిటీ ఏర్పాటు చేస్తామని చెప్పారు. నగరంలో మాంసం దుకాణాల వ్యర్థాలను ఎక్కడ పడితే అక్కడ పడవేయకుండా కవర్లను అందజేయనున్నామని చెప్పారు. ఇప్పటికే వారికి నోటీసులు కూడా జారీచేశారని స్పష్ట చేశారు.

అందరికి అవగాహన కల్పించాలి: కుక్కల బెడదే కాకుండా కొన్ని ప్రాంతాల్లో కోతుల బెడదకు కూడా చర్యలు తీసుకుంటున్నట్టు జీహెచ్‌ఎంసీ కమిషనర్‌ లోకేష్‌ కుమార్‌ తెలిపారు. పశువులను కూడా వెనువెంటనే గోశాలకు తరలించేందుకు చర్యలు తీసుకుంటున్నామని ఆయన తెలిపారు. కాలనీలు, బస్తీల సంఘాలకు కూడా సమస్య పై అవగాహన కల్పిస్తున్నామని చెప్పారు. వీధికుక్కలను పెంచుకోవడానికి ముందుకు వచ్చినవారికి ఉచిత లైసెన్సు, రిజిస్ట్రేషన్ చేస్తామని తెలిపారు. వాటి చికిత్సను కూడా త్వరితగతిన అందించేందుకు చర్యలు తీసుకుంటున్నారని వెల్లడించారు.

ఇవీ చదవండి: