మ్యాన్​హోల్స్​ మరమ్మతులపై బల్దియా దృష్టి

హైదరాబాద్​లో మ్యాన్​హోల్స్​పై నగరపాలక సంస్థ దృష్టిసారించింది. అస్తవ్యస్తంగా, పైకప్పులు లేకుండా ఉన్న వాటిని వీలైనంత త్వరగా మరమ్మతులు చేసేందుకు చర్యలు ప్రారంభించింది. వర్షాకాలంలో ప్రజల ఇబ్బందులను దృష్టిలో ఉంచుకుని రూ.20 కోట్ల ప్రాథమిక అంచనాలతో ప్రణాళికలు రూపొందించింది.

వర్షాకాలంలో నగరవాసులకు ఎటువంటి అసౌకర్యం కలగకుండా చూసేందుకు బల్దియా ప్రణాళికలు సిద్ధం చేసింది. ప్రధానంగా గ్రేటర్​లో మ్యాన్​హోల్​ మరమ్మతులపై జీహెచ్​ఎంసీ దృష్టిసారించింది. ఈ మ్యాన్​హోల్స్​ నగరంలో పలుచోట్ల రహదారి కంటే ఎత్తుగా, మరికొన్ని చోట్ల లోతుగా ఉండటం వల్ల ప్రమాదాలు జరుగుతున్నాయి. పైకప్పులు లేని మ్యాన్​హోల్స్​లో వాహనదారులు పడి మరణించిన సందర్భాలూ ఉన్నాయి. ఇలాంటి ప్రమాదాలను నియంత్రించేందుకు వర్షాకాలం కంటే ముందే మరమ్మతులు చేయాలని బల్దియా భావిస్తోంది.

జీహెచ్​ఎంసీ, జలమండలి, హైదరాబాద్​ రహదారుల అభివృద్ధి సంస్థ అధికారులు సంయుక్తంగా ప్రమాదకర మ్యాన్​హోల్స్​పై దృష్టిసారించారు. నగరంలో సుమారు 17 వేల క్యాచ్​పిట్​లు, మ్యాన్​హోల్స్​, జలమండలికి చెందిన స్లూయిస్​ వాల్వ్​ ఛాంబర్లు ఉన్నాయి. వాటన్నింటిని రహదారులకు సమాంతరంగా చేసే పనులు వేగవంతమయ్యాయి.

ఇందుకోసం రూ.20 కోట్ల ప్రాథమిక అంచనాలతో పనులు ప్రారంభించారు. జలమండలి రూ.15 కోట్లు, జీహెచ్​ఎంసీ రూ. 6.18 కోట్లు కేటాయించింది. ఒక్కో మ్యాన్​హోల్​ మరమ్మతుకు సుమారు రూ.12 వేలు వ్యయమవుతుందని అధికారుల అంచనా. గతంలోనే అధికారులు మ్యాన్​హోల్స్​పై దృష్టిసారించిన శాఖల మధ్య సమన్వయ లోపంతో పూర్తిస్థాయిలో పనులు జరగలేదు. కనీసం ఈసారైనా పటిష్ఠ ప్రణాళికలు రూపొందించి, పనులు పూర్తిచేయాలని పలువురు కోరుతున్నారు.

ఇవీ చూడండి: పోలీసులను ఫూల్ చేయలేరు... పట్టేసుకుంటాం...