రాష్ట్రంలో రైతుబజార్ల అభివృద్ధికి ప్రభుత్వం పెద్దపీట వేస్తోంది. రైతులు.. ప్రజల సౌకర్యార్థం అత్యాధునిక సౌకర్యాలతో ఏర్పాటు చేస్తోంది. రాష్ట్ర రాజధాని హైదరాబాద్‌లోని కూకట్‌పల్లి, భువనగిరి, సిరిసిల్ల రైతుబజార్లను నవీకరించేందుకు మార్కెటింగ్‌ శాఖ రూ. 20.63 కోట్లు కేటాయించింది. ఐటీ పరిశ్రమలకు దగ్గరగా ఉన్నందున కూకట్‌పల్లి రైతుబజారుకు నూతన హంగులు అద్దెందుకు ఏకంగా రూ. 18.53 కోట్లు ఇచ్చింది. వీటన్నింటికి మహర్దశ పట్టనుంది.
కొన్ని పట్టణాలు, నగరాల్లో ప్రజలకు అందుబాటులో భూమి లేకపోవడం వల్ల వీటి ఏర్పాటులో జాప్యం నెలకొంటోంది. ప్రస్తుతం కొత్తగా 16 రైతుబజార్ల ఏర్పాటుకు రూ. 18.88 కోట్లను మార్కెటింగ్‌ శాఖ మంజూరు చేసింది. కొన్నిచోట్ల పట్టణాల్లో జనావాసాల మధ్య స్థలాలున్నా.. వాటిపై ప్రైవేటు వ్యక్తులు కోర్టుల్లో కేసులు వేసి అడ్డుకుంటున్నారు.
రాష్ట్రం ఏర్పడినప్పుడు 30 రైతుబజార్లు..
తెలంగాణ రాష్ట్రం ఏర్పడినప్పుడు 30 రైతుబజార్లు ఉండేవి. ప్రజల సౌకర్యార్థం ప్రభుత్వం మరో 30 మంజూరు చేసింది. వీటిలో 16 రైతు బజార్ల నిర్మాణం కూడా పూర్తి కాలేదు. ప్రస్తుతమున్న 44లో సంగారెడ్డి జిల్లా రామచంద్రపురంలో ఏర్పాటు చేసింది మాత్రమే అక్కడి పురపాలక సంఘం పరిధిలో ఉంది. మిగతావన్ని స్థానిక వ్యవసాయ మార్కెట్‌ కమిటీలే నిర్వహిస్తున్నాయి. కొత్త వాటి నిర్మాణం పూర్తయితే.. ఒక్కోదాని పరిధిలో అదనంగా అయిదారు గ్రామాల రైతులు కూరగాయలు తెచ్చి అమ్మడానికి అవకాశం ఏర్పడుతుంది. దీనివల్ల అదనంగా 150 గ్రామాల్లో కూరగాయల పంటల సాగు, దిగుబడులు పెంచడానికి అవకాశం ఏర్పడుతుందని మార్కెటింగ్‌ శాఖ ప్రభుత్వానికి నివేదించింది.
పాత రైతు బజార్లలో సమస్యలు