Four Train Services Extended in Telangana : తెలంగాణ ప్రాంతంలో దక్షిణ మధ్య రైల్వే(South Central Railway) నాలుగు రైలు సర్వీసులను పొడిగించింది. ఈ రోజు ఉదయం 8.45 గంటలకు పొడిగించిన రైలు సర్వీసులను జెండా ఊపి కేంద్రమంత్రి కిషన్‌ రెడ్డి(Kishan Reddy) ప్రారంభించనున్నారు. సికింద్రాబాద్‌లో జరిగే ఈ కార్యక్రమంలో రాష్ట్రమంత్రులు తలసాని శ్రీనివాస యాదవ్‌, డిప్యూటీ స్పీకర్‌ పద్మారావు, దక్షిణ మధ్య రైల్వే జనరల్‌ మేనేజర్‌ అరుణ్‌ కుమార్‌ జైన్‌, ఇతర సీనియర్‌ రైల్వే అధికారులు పాల్గొనున్నారని దక్షిణ మధ్య రైల్వే శాఖ వెల్లడించింది.
హడప్సర్‌-హైదరాబాద్ ఎక్స్‌ప్రెస్‌ రైలును కాజీపేట వరకు పొడిగించారు. అలాగే జైపూర్‌-కాచిగూడ ఎక్స్‌ప్రెస్‌ను కర్నూలు సిటీ వరకు పొడిగిస్తూ దక్షిణ మధ్య రైల్వే నిర్ణయం తీసుకుంది. నాందేడ్‌-తాండూరు ఎక్స్‌ప్రెస్‌ రైలును రాయచూర్‌ వరకు.. కరీంనగర్‌-నిజామాబాద్‌ ఎక్స్‌ప్రెస్‌ను బోధన్‌ వరకు పొడిగించారు. ఈ పొడిగించిన నాలుగు రైళ్ల సర్వీసులకు(Four Trains Extended in Telangana) బుకింగ్‌లు అందుబాటులో ఉంచినట్లు దక్షిణ మధ్య రైల్వే శాఖ తెలిపింది. నేటి నుంచి పొడిగించిన 17014/17013 కాజీపేట రైలు సికింద్రాబాద్‌ నుంచి బయలుదేరుతుంది.
Amrit Bharat Station Scheme : 'రూ.300 కోట్లతో హైదరాబాద్ నుంచి యాద్రాద్రికి ఎంఎంటీఎస్‌'
Four Train Services Extended in Telangana : ఈరోజు నుంచి పుణె(హదాప్సర్‌)-కాజీపేట-పుణె(హదాప్సర్‌) రైలు సికింద్రాబాద్‌ రైల్వే స్టేషన్‌ నుంచి బయలుదేరుతుందని దక్షిణ మధ్య రైల్వే శాఖ వెల్లడించింది. ఇప్పటివరకు ఈ రైలు హైదరాబాద్ స్టేషన్‌ నుంచి బయలుదేరి వెళ్లగా.. ఇక నుంచి సికింద్రాబాద్‌ స్టేషన్‌ నుంచి వెళుతుందని అధికారులు తెలిపారు. కనుక ఈ విషయాన్ని ప్రయాణికులు అందరూ గమనించాలని విజ్ఞప్తి చేశారు. హడప్సర్‌-హైదరాబాద్ ఎక్స్‌ప్రెస్‌ కాజీపేట వరకు పొడిగించిన సర్వీసును సికింద్రాబాద్‌ రైల్వే స్టేషన్‌ నుంచి మిగిలిన మూడు రైళ్లను దృశ్యమాధ్యమం ద్వారా ప్రారంభించనున్నట్లు రైల్వే శాఖ ప్రకటనలో తెలిపింది. దీంతో ఈ ప్రాంతాలకు వెళ్లే ప్రయాణికులకు శుభవార్త అందించినట్లు అయింది.