హైదరాబాద్ వనస్థలిపురంలో కరోనా పాజిటివ్ కేసుల సంఖ్య క్రమంగా పెరుగుతోంది. ఇప్పటి వరకు ఇక్కడ కేసుల సంఖ్య 17కు చేరింది.
క్రమంగా విస్తరిస్తోన్న మహమ్మారి...
హిల్స్ కాలనీలో ఓ వృద్ధురాలు కరోనా బారినపడగా ఆమెకు ప్రైమరీ కాంటాక్ట్లో ఉన్న వారి నమూనాలు సేకరించారు. వారిలో వృద్ధురాలి కుమార్తె, అల్లుడు, ఇద్దరు మనవళ్లకు కరోనా వైరస్ సోకినట్లు జిల్లా వైద్యాధికారులు వెల్లడించారు.
మర్కజ్ విషయంలోనూ అంతే...
గతంలో మర్కజ్ కేసుల విషయంలోనూ ఓ వ్యక్తి కరోనా బారినపడి కోలుకోగా, అస్సోంకు చెందిన మరో వ్యక్తి ఆస్పత్రిలో చికిత్స పొందుతున్నాడు.
ఆస్పత్రికి.. మరో ముగ్గురి నమూనాలు !
ఈ క్రమంలోనే హుడా సాయినగర్లో కరోనా బాధిత కుటుంబంలో జలుబు, జ్వరంతో బాధపడుతున్న మరో ముగ్గురి నమూనాలు సేకరించారు. అనంతరం అనుమానితులను కింగ్ కోఠిలోని ఆస్పత్రికి తరలించారు. మరోవైపు ఫీవర్ సర్వైలెన్స్లో భాగంగా కంటైన్మెంట్ జోన్లలో వైద్య ఆరోగ్య శాఖ సిబ్బంది సర్వే చేస్తున్నారు. గర్భిణీలు, చిన్నపిల్లలపై ప్రత్యేక దృష్టిసారించి వివరాలు సేకరిస్తున్నారు. ఇప్పటికే హోం క్వారంటైన్లో ఉన్న 169 కుటుంబాలను నిత్యం పర్యవేక్షిస్తున్నారు.
కరోనా బారిన 6, 6, 3
కరోనా వైరస్ వ్యాప్తితో వనస్థలిపురంలోని ఒక కుటుంబంలో ఆరుగురు, మరో కుటుంబంలో ఆరుగురు, ఇంకో కుటుంబంలో ముగ్గురు వైరస్ బారినపడ్డారు. ఫలితంగా స్థానికుల్లో ఆందోళన మరింత తీవ్రమైంది. క్రమంగా కరోనా పాజిటివ్ కేసుల సంఖ్య పెరుగుతున్న నేపథ్యంలో మల్కాజ్గిరి ఎంపీ రేవంత్ రెడ్డి హుడా సాయినగర్ కాలనీని సందర్శించి స్థానికులతో మాట్లాడారు.
ఇవీ చూడండి : క్షౌరశాలలు లేకుంటేనేం.. మీకు నేనున్నానంటున్న మహిళ.!
