పోలీస్​నంటూ బుకాయించాడు... చివరకు అడ్డంగా బుక్కయ్యాడు

నకిలీ పోలీసు వేషం కట్టి.. రాష్ట్రం దాటడానికి ప్రయత్నించిన ఓ వ్యక్తిని ఆంధ్రప్రదేశ్​లోని విజయవాడ పోలీసులు అరెస్టు చేశారు. గొల్లపూడి వద్ద తనిఖీలు నిర్వహిస్తుండగా ఓ వ్యక్తి సైబరాబాద్ ఎస్ఐని అంటూ... గుర్తింపు కార్డు చూపించాడు. అది నకిలీ కార్డుగా గుర్తించిన పోలీసులు... నిందితుడిని అదుపులోకి తీసుకుని విచారణ చేపట్టారు.

ఆంధ్రప్రదేశ్​లోని విజయవాడలో ఓ నకిలీ పోలీసును భవానీపురం పోలీసులు అరెస్టు చేశారు. కొవిడ్​-19 కారణంగా ఏర్పాటు చేసిన అంతరాష్ట్ర చెక్ పోస్టులను దాటేందుకు ఓ వ్యక్తి సైబరాబాద్‌ ఎస్ఐగా వేషం కట్టి... పోలీసులకు దొరికిపోయాడు. విజయవాడ శివారు గొల్లపూడి సమీపంలో... భవానిపురం పోలీసులు తనిఖీలు నిర్వహిస్తుండగా నకిలీ గుర్తింపు కార్డుతో వెళ్తున్న అతడు.. అడ్డంగా పట్టుబడ్డాడు.

నిందితుడు తూర్పుగోదావరి జిల్లా ముమ్మిడివరానికి చెందిన గుత్తాల ప్రశాంత్​గా పోలీసులు... విచారణలో గుర్తించారు. ప్రశాంత్​ హైదరాబాదులో ఓ యూట్యూబ్ ఛానల్ నిర్వహించేవాడని తెలిపారు. అతడి నుంచి స్విప్ట్ డిజైర్ కారు, నకిలీ గుర్తింపు కార్డులు, పోలీస్ యూనిఫాం స్వాధీనం చేసుకున్నారు. కేసు నమోదు చేసిన భవానీపురం పోలీసులు విచారణ చేపట్టారు.

ఇదీ చూడండి :కేటుగాడు.. ఎస్సైనంటూ యువతిని వంచించి పెళ్లి.!