Mental stability in Kids : కొవిడ్‌ నేపథ్యంలో గడిచిన రెండేళ్లలో అనేక మంది ఇంటి పట్టునే ఉన్నారు. ఎక్కువ కాలం ఇంట్లో కుటుంబ సభ్యుల మధ్య ఉండటంతో.. కొందరిళ్లల్లో బంధాలు బలపడగా.. మరికొన్ని చోట్ల మనస్పర్ధలు తలెత్తాయి. ఆ ప్రభావం చిన్నారులపై పడింది. ఎలక్ట్రానిక్‌ పరికరాలకు పిల్లలు బానిసలుగా మారడం కూడా మానసిక సమస్యలు పెరగడానికి కారణమైంది. తమకు తెలియకుండానే బిడ్డలు ఆందోళన, ఒత్తిడి, కుంగుబాటు వంటి మానసిక రుగ్మతల బారినపడ్డారు. ఇటువంటి పరిస్థితే బ్రిటన్‌లో ఎదురైనప్పుడు.. అక్కడ అన్ని విద్యాసంస్థల్లోనూ సైకాలజిస్ట్‌లను నియమించారు. పిల్లల్లో మనోవికాసానికి దోహదపడ్డారు. పాఠశాలలు తిరిగి ప్రారంభమయ్యే వేళ మన దగ్గర కూడా సైకోథెరపిస్టుల సేవలను వినియోగించాలంటున్నారు నిపుణులు.
ఘర్షణకు సాక్ష్యంగా..
Mental stability in Children : కొవిడ్‌కు ముందు పొద్దున 7-8 గంటలకు ఇంట్లోంచి బడికి వెళ్తే.. సాయంత్రం 4-5 గంటలకు వచ్చేవారు. ఆ తర్వాత ఆడుకోవడం, టీవీ చూడటం, హోంవర్కు.. పడుకోవడంతో రోజు గడిచిపోయేది. ఇంట్లో తల్లిదండ్రుల మధ్య ఎప్పుడైనా ఘర్షణ వాతావరణం తలెత్తినా.. అందుకు పిల్లలు సాక్షీ భూతంగా నిలిచే అవకాశాలు చాలా తక్కువ. కొవిడ్‌ కాలంలో ఇంట్లోనే ఉండటంతో ఎక్కువ సందర్భాల్లో తల్లిదండ్రుల మధ్య ఘర్షణ తలెత్తితే ఆ ప్రభావం.. పిల్లలపై పడింది.
సాంకేతికతతో చేటు..
కొవిడ్‌ కాలంలో సాంకేతిక పరికరాలను అనివార్యంగా పిల్లలు వాడాల్సి వచ్చింది. అత్యధిక సంఖ్యలో చిన్నారులు సెల్‌ఫోన్‌, ట్యాబ్‌లకు బానిసలుగా మారారు. అరచేతిలో ప్రపంచం కనిపిస్తున్నప్పుడు కొన్నిసార్లు తెలియకుండానే తప్పుడు వెబ్‌సైట్‌లోకి చొరబడే ప్రమాదమూ ఉంది. అవాంఛనీయ వెబ్‌సైట్‌లను చూడడం వల్ల కూడా పిల్లలపై మానసికంగా దుష్ప్రభావం పడుతుంది. సామాజిక మాధ్యమాల ప్రభావమూ ఎక్కువైంది. కొవిడ్‌ కాలంలో ఎక్కువ మంది విద్యార్థులు చదువులో వెనుకబడ్డారు. కొవిడ్‌ కాలంలో చాలా మంది పిల్లల్లో మంచి నిద్ర, శారీరక శ్రమ, బలవర్ధకమైన ఆహారం దూరమయ్యాయి. ఆలస్యంగా నిద్ర లేవడం.. భోజన సమయంలో అల్పాహారం తీసుకోవడంతోపాటు జంక్‌ఫుడ్‌కు అలవాటయ్యారు. బడిలో ఉంటే ఆటలు ఆడుకునేవారు. కానీ ఇంట్లోనే ఉండడం వల్ల శారీరక శ్రమకు దూరమయ్యారు.
ఒత్తిడిలో ఉన్నట్లు గుర్తించడమెలా?
ఒత్తిడిలో ఉన్నప్పుడు కొందరు తిండి ఎక్కువగా తింటారు. మరికొందరు అతిగా నిద్రపోతారు. నిద్ర సరిగారాని వారు కొందరు. గతంలో ఉత్సాహంగా బయటకు వెళ్లేందుకు ముందుకొచ్చిన పిల్లలు.. ఇప్పుడు మొండికేయడం కూడా ఒత్తిడికి ఒక సంకేతమే. కొవిడ్‌ కంటే ముందు చదువులో మంచి ప్రతిభ చూపే పిల్లల్లో ఇప్పుడు ఆ చురుకుదనం తగ్గిపోయిందంటే ఏదో జరిగిందని గ్రహించాలి.