బాల్యంలో అధిక మోతాదులో చక్కెర, కొవ్వు పదార్థాలు తీసుకోవడం వల్ల శారీరక మార్పులే కాదు, జీవక్రియల్లో కీలకంగా వ్యవహరించే సూక్ష్మజీవుల పనితీరులో, వాటి సంఖ్యలో మార్పులు వస్తాయని శాస్త్రవేత్తలు కొనుగొన్నారు. ఇటీవల నిర్వహించిన ఓ పరిశోధనకు సంబంధించిన ఫలితాలను జర్నల్‌ ఆఫ్‌ ఎక్స్‌పరిమెంటల్‌ బయాలజీలో ప్రచురించారు.
మానవ శరీరంలో బ్యాక్టీరియా, ఫంగి, వైరస్‌ ఇలా అనేక రకాల సూక్ష్మజీవులు జీవిస్తుంటాయి. వీటిలో కొన్ని మానవునికి హాని చేస్తే.. మరికొన్ని జీవక్రియలో, రోగనిరరోధక శక్తిని పెంచడంలో, కొన్ని విటమిన్ల ఉత్పత్తిలో కీలక పాత్ర పోషిస్తున్నాయి. పేగుల్లో అనేక రకాల సూక్ష్మజీవులు ఆవాసం ఉంటూ జీర్ణక్రియలో తమ వంతు పాత్ర పోషిస్తుంటాయి. ఇలాంటి మంచి సూక్ష్మజీవుల పనితీరు సరిగా ఉన్నప్పుడే శరీరంలో ఎలాంటి అసమానతలు తలెత్తవు. ఆరోగ్యంగా ఉండగలరు. మానవులు చిన్న వయసులో ఎక్కువగా చక్కెర, కొవ్వు పదార్థాలు తింటే వయసు పెరిగే కొద్ది.. సూక్ష్మజీవుల పనితీరులో మార్పులు చోటు చేసుకుంటాయని ఆ తర్వాత రోగాల బారిన పడే అవకాశముందని శాస్త్రవేత్తలు చెబుతున్నారు. పెద్దయ్యాక ఆరోగ్యకరమైన ఆహారం తీసుకున్నా లాభం ఏమీ ఉండదని స్పష్టం చేశారు.