నయాసాల్​ వేడుకలపై ఆబ్కారీ శాఖ నిఘా

నూతన సంవత్సరం పురస్కరించుకుని ఆబ్కారీ శాఖ అప్రమత్తమైంది. నాన్ డ్యూటీ పెయిడ్ లిక్కర్​తో పాటు నాటుసారా, కల్తీ కల్లు, మిథనాల్ ఉత్పత్తి, నిల్వలపై దృష్టి సారించాలని యంత్రాంగాన్ని ఆ శాఖ కమిషనర్ సర్ఫరాజ్​ అహ్మద్​ ఆదేశించారు. మద్యం వాడకం అధికంగా ఉన్నందున గరిష్ఠ చిల్లర ధర ఉల్లంఘనలు జరిగే అవకాశం ఉండడం వల్ల ఎన్​ఫోర్స్​మెంట్​ విభాగం నిఘా పెట్టింది.

నయాసాల్​ షురూ అవుతున్నందున తెలంగాణలో మద్యం వాడకం అనూహ్యంగా పెరిగే అవకాశం ఉంది. ఈరోజు మధ్యాహ్నం నుంచి బుధవారం అర్ధరాత్రి వరకు మద్యం వాడకం అధికం కానుండటం వల్ల ఆబ్కారీ శాఖ అప్రమత్తమైంది. ఆ శాఖ కమిషనర్ సర్ఫరాజ్ అహ్మద్... రాష్ట్రంలోని ఆబ్కారీ శాఖ ఉప కమిషనర్లు, సహాయ కమిషనర్లు, ఎన్​ఫోర్స్​మెంట్​ విభాగాల అధికారులను అప్రమత్తంగా ఉండాలని ఆదేశించారు.

మిథనాల్​పై నిఘా

ప్రధానంగా రాష్ట్ర సరిహద్దుల నుంచి రాష్ట్రంలోకి నాన్ డ్యూటీ పెయిడ్ సరఫరా అయ్యే అవకాశం ఉందని అధికారులను సర్ఫరాజ్​ హెచ్చరించారు. మద్యం కల్తీ చేసేందుకు ఉపయోగించే మిథనాల్ తయారీ కేంద్రాలపై గట్టి నిఘా పెట్టాలని స్పష్టం చేశారు. మిథనాల్ పక్కదారి పట్టి అక్రమార్కుల చేతుల్లోకి వెళ్లినట్లయితే అనుకోని ఘటనలు చోటు చేసుకునే ప్రమాదం ఉందని హెచ్చరించారు.

ఎలా వచ్చింది?

పరిశ్రమలకు వాడే ఆల్కాహాల్ సరఫరా, నిల్వలను ఎప్పటికప్పుడు తనిఖీ చేయాలని కమిషనర్ ఆదేశించారు. ఎక్కడైనా... మిథనాల్ దొరికినట్లయితే అది ఎక్కడి నుంచి వచ్చింది, ఎలా వచ్చిందో తెలుసుకోవాలని సూచించారు. క్షేత్ర స్థాయిలో సమాచార సేకరణ పటిష్ఠంగా జరిగేటట్లు తగిన చర్యలు తీసుకోవాలన్నారు.

సోదాలు చేయాలి

బయటి రాష్ట్రాల నుంచి అక్రమ మద్యం చొరబాటు అయ్యే అవకాశం ఉన్నందున అధికారులు తనిఖీలు ముమ్మరం చేయాలన్నారు. సహాయ కమిషనర్ ఆధ్వర్యంలో ప్రత్యేకంగా బృందాలను సిద్ధం చేసి సోదాలు చేయాలని ఆదేశించారు. కల్తీ మద్యం, నాటుసారా అధికంగా వాడే అవకాశం ఉందని​ తెలిపారు. రాష్ట్రంలోని ఆబ్కారీ శాఖ సీఐలు వారి పరిధిలోని ప్రత్యేక బృందాలతో సోదాలు నిర్వహించాలని ఆదేశించారు.

• ఇదీ చూడండి:ఇకపై వాట్సాప్​ సందేశాలు మాయం చేయొచ్చు!