కారుణ్య నియామకం కింద నేరుగా ఎస్సై పోస్టుకే ఎంపిక - ఎక్సైజ్‌ శాఖలో వింత

Excise Department Inquiry in SI job Dispute : బీఆర్ఎస్‌ పాలనలో జరిగిన అక్రమాలపై కాంగ్రెస్‌ ప్రభుత్వం ఫోకస్ పెట్టింది. ఇప్పటికే అసెంబ్లీ సాక్షిగా శ్వేతపత్రాలను విడుదల చేసింది. తాజాగా ఉద్యోగ నియమాకాల్లో జరిగిన అవినీతిపై దృష్టి సారించింది. జెన్‌కోలో గతంలో నిబంధనలకు విరుద్ధంగా ఏఈ ఉద్యోగం భర్తీ చేశారనే ఆరోపణలు వెలుగులోకి వచ్చాయి. తాజాగా ఎక్సైజ్‌శాఖలో ఓ కారుణ్య నియామకానికి సంబంధించిన మరో విషయం బయటకు వచ్చింది. ఇప్పుడు ఇది చర్చనీయాంశంగా మారింది.

Excise Department Inquiry in SI job Dispute :రాష్ట్రంలో గత ప్రభుత్వం వ్యవస్థలను అస్తవ్యస్తం చేసి నిర్వీర్యం చేసిందని, కాంగ్రెస్ సర్కార్ ఆరోపిస్తోంది. వాటన్నింటిని చక్కపెట్టే దిశగా చర్యలు చేపడుతోంది. ఇందులో భాగంగానే ఆర్థిక వ్యవస్థతో పాటు ఇతర వ్యవస్థలపై దృష్టి పెట్టామని సర్కార్ చెబుతోంది. గతంలో జరిగిన అవినీతి, అక్రమాలపై చర్యలు తప్పవని స్పష్టం చేస్తోంది. తాజాగా తెలంగాణ ఆబ్కారీ శాఖలో ఐదేళ్ల క్రితం జరిగిన కారుణ్య నియామకం ఇప్పుడు చర్చనీయాంశంగా మారింది.

సాధారణంగా ఇలా నియమించే వారిని జూనియర్‌ అసిస్టెంట్‌ లేదా తక్కువ స్థాయి ఉద్యోగానికి ఎంపిక చేయాల్సి ఉంటుంది. కానీ ఇక్కడ తండ్రి మరణించే నాటికి విదేశాల్లో ఉద్యోగం చేస్తున్న వ్యక్తిని తీసుకొచ్చి మరీ అదే శాఖలో ఎస్సైగా నియమించారు. దీని కోసం అప్పట్లో గత ప్రభుత్వంలో కీలకంగా వ్యవహరించిన నాయకుడు ఒకరు నేరుగా రంగంలోకి దిగినట్లు సమాచారం. ఎక్సైజ్‌శాఖ ( Excise Department in Telangana) ఉన్నతాధికారులు అభ్యంతరం వ్యక్తం చేసినా, ప్రత్యేకంగా వన్‌ టైం జీవో ద్వారా నియామకం చేపట్టినట్లు తెలుస్తోంది.

రెగ్యులర్‌ రిక్రూట్‌ ఎస్సైగానే పరిగణించాలని జీవో : రెగ్యులర్‌ రిక్రూట్‌ ఎస్సైగానే పరిగణించాలని జీవోలో పేర్కొన్నట్లు సమాచారం. సాధారణంగా విధి నిర్వహణలో సంఘ విద్రోహ శక్తుల చేతుల్లో హతమవడం లాంటి ప్రత్యేక పరిస్థితుల్లో మాత్రమే అలా అధికారి హోదాలో కారుణ్య ఉద్యోగానికి ఎంపిక చేస్తారు. అదేవిధంగా ఈ నియామక ప్రక్రియను అదే తరహాలోనే పూర్తి చేసినట్లు తెలుస్తోంది. ఎక్సైజ్‌శాఖలో ఎస్సై కొలువులో చేరిన ప్రతి ఒక్కరూ తప్పనిసరిగా శాఖాపరమైన శిక్షణ పొందాల్సి ఉంటుంది. కానీ ఈయన శిక్షణ పొందలేదని చెబుతున్నారు.

రెండు సంవత్సరాల క్రితం ఆయన ఇన్‌స్పెక్టర్‌గా సైతం పదోన్నతి పొందడం గమనార్హం. ప్రస్తుతం ఉమ్మడి నిజామాబాద్‌ జిల్లాలో కీలక స్థానంలో విధులు నిర్వర్తిస్తున్న ఆయన నియామక ప్రక్రియ గురించి ఆబ్కారీ శాఖ ఉన్నతాధికారులు ఆరా తీస్తున్నట్లు తెలుస్తోంది. శిక్షణ తీసుకోలేదనే విషయం విచారణలో తేలితే శాఖాపరమైన చర్యలు తీసుకుంటారని ఎక్సైజ్‌శాఖ విశ్రాంత ఉన్నతాధికారి ఒకరు తెలిపారు. దీంతో పాటు రివర్షన్‌ ఇచ్చే అవకాశం లేకపోలేదని ఆయన స్పష్టం చేశారు.

Genco Assistant Engineer Job Dispute :మరోవైపు జెన్‌కోలో గతంలో నిబంధనలకు విరుద్ధంగా సహాయ ఇంజినీరు(ఏఈ) (Assistant Engineer Dispute) ఉద్యోగం భర్తీ చేశారని, వచ్చిన ఆరోపణలపై ఉన్నతాధికారులు అంతర్గత విచారణ జరుపుతున్నారు. సరిత అనే అమ్మాయికి సాధారణ నియామక విధానంలో కాకుండా, నేరుగా ఏఈ ఉద్యోగం ఇచ్చారనే ఆరోపణలు రావడంతో వివరాలను సేకరించే పనిలో పడ్డారు. నిబంధనల ప్రకారం సాధారణ పద్ధతిలో ఏఈ పోస్టుల భర్తీకి రాష్ట్రస్థాయిలో రాతపరీక్ష నిర్వహించి మెరిట్‌ జాబితా ప్రకారం ఉద్యోగాలు ఇవ్వాలి.

కాగా ఈ యువతి తొలుత కాంట్రాక్టు విధానంలో టెక్నికల్‌ అసిస్టెంట్‌గా కొలువులో చేరినట్లు సమాచారం. ఆ తరవాత జెన్‌కో పాలక మండలి ఆమోదంతో, ఏఈగా ఉద్యోగాన్ని క్రమబద్ధీకరించారని ప్రభుత్వ విచారణలో నిర్ధారించారు. కానీ సహాయ ఇంజినీరుగా ఉద్యోగం రెగ్యులర్‌ అయినా, ఆమెను సచివాలయంలో రోజువారీగా పని చేయాలని ఉత్తర్వులిచ్చినట్లు జెన్‌కో అధికారులు ప్రభుత్వానికి నివేదించారు.

ఇంకా ఏమైనా ఉద్యోగాలిచ్చారా అనే దానిపై ప్రభుత్వం ఆరా : సచివాలయానికి ఆమెను బదిలీ చేసిన ఉత్తర్వుల కాపీని, అక్కడ విధుల్లో చేరినట్లు అప్పట్లో ఆమె ఇచ్చిన చేరిక లేఖను సైతం ఉన్నతాధికారులకు జెన్‌కో అధికారులు శనివారం అందజేశారు. విద్యుత్‌ సంస్థల్లో ఇలా రాజకీయ నాయకుల బంధువులు, అనుచరులకు ఇంకా ఏమైనా గతంలో ఉద్యోగాలిచ్చారా అనే వివరాలను సైతం ప్రభుత్వం సేకరిస్తోంది.