హైదరాబాద్లో రెచ్చిపోతున్న కల్తీరాయుళ్లు హైదరాబాద్ నగర పాలక సంస్థ పరిధిలో కల్తీరాయుళ్లు హల్చల్ చేస్తున్నారు. తక్కువ సమయంలో డబ్బు సంపాదించడమే లక్ష్యంగా అడ్డదారులు తొక్కుతున్నారు. ఆకర్షణీయమైన ప్యాకింగ్‌లతో జనాన్ని బోల్తా కొట్టిస్తున్నారు. ప్రజల ఆరోగ్యం కంటే... వ్యక్తిగత లాభార్జనే ధ్యేయంగా కల్తీ చేసి మార్కెట్లోకి వదిలి ప్రజల ఆరోగ్యాంతో ఆడుకుంటున్నారు.
పాల నుంచి బియ్యం దాకా...
బియ్యంలో రాళ్లు, నాసిరకం బియ్యం కలపడం, కారంపొడికి రంపపు పొట్టు కలపడం, యూరియా, ఇతర రసాయనాలతో పాలు తయారు చేయడం, పెట్రోల్, డీజిల్లో కిరోసిన్ కలపడం, సాధారణ ఇంజిన్ ఆయిల్ను బ్రాండెడ్ లేబులింగ్ చేసి సొమ్ము చేసుకోవడం, మేలు రకం లిక్కర్ సీసాల్లో చౌక మద్యాన్ని నింపడం... ఇలా ప్రతిదీ కల్తీ చేస్తున్నారు. ఏది నకిలీ, ఏదీ అసలు అన్నది ప్రజలు తెలుసుకోలేకపోతున్నారు.
దాడులకే పరిమితం...
తరచూ టాస్క్ఫోర్స్ పోలీసులు దాడులు నిర్వహించినా... కల్తీని అరికట్టేందుకు తీసుకుంటున్న చర్యలు అంతంతమాత్రమే! హైదరాబాద్ పాతబస్తీ లాల్దర్వాజ ప్రాంతంలో... కల్తీ ఇంజిన్ ఆయిల్ తయారీ కేంద్రంపై ఈస్ట్ జోన్ టాస్కఫోర్స్ పోలీసులు దాడులు చేశారు. ప్రాంగణమంతా డ్రమ్ములు, ఖాళీ ఆయిల్ ప్లాస్టిక్ డబ్బాలు, వివిధ ఆయిల్ కంపెనీల లేబుళ్లు పెద్ద సంఖ్యలో దర్శనమిచ్చాయి. ఆరు వందలకుపైగా వివిధ బ్రాండ్‌ల ఖాళీ ఆయిల్ డబ్బాలు, ఒక బ్యారెల్‌ ల్యూబ్రికెంట్‌ ఆయిల్, ఒక కార్టన్‌ డ్యూప్లికెట్‌ ఇంజిన్ అయిల్‌, ఆయిల్ నింపే మిషన్, ఐదు వందలకుపైగా బజాజ్‌, టీవీఎస్‌ ఆయిల్ లేబుళ్లు స్వాధీనం చేసుకున్నారు.
గ్రామీణ ప్రాంతాలే లక్ష్యం...
నిందితుడు దినేష్‌కుమార్‌ అగర్వాల్‌ను విచారించగా... విస్తుగొలిపే నిజాలు బయట పడ్డాయి. పదేళ్లుగా ఆయిల్ కల్తీ చేసి విక్రయిస్తున్నట్లు వెల్లడైంది. రూ. 20 నుంచి రూ. 30 విలువైన ఆయిల్ను బ్రాండెడ్ ఆయిల్ డబ్బాల్లో నింపి విక్రయిస్తున్నారు. నగరంలో పట్టుబడతామని భావించిన అగర్వాల్... గ్రామీణ ప్రాంతాలను ఎంచుకున్నట్లు పోలీసులు తెలిపారు. అక్రమ దందా స్థావరంపై శనివారం రాత్రి అతన్ని అరెస్ట్‌ చేసిన టాస్క్ఫోర్స్ పోలీసులు... తదుపరి విచారణకు కోసం శాలిబండ పోలీసులకు అప్పగించారు.
