ఏరువాక పున్నమికి శ్రీకారం చుట్టనున్న రైతులు

ఏరువాక వేడుక నిర్వహించేందుకు రైతులు సిద్ధమయ్యారు. జ్యేష్ఠ శుద్ధ పౌర్ణమి రోజు ఉత్సాహబరితంగా... ఏరువాక పర్వదినం నిర్వహిస్తారు. ఎడ్లను అలంకరించి పూజ చేసిన అనంతరం.... సామూహికంగా దుక్కి దున్నుతారు.

అన్నదాతలు తొలిసారిగా భూక్షేత్రంలో నాగలి పట్టి దున్నే ముందు భూమి పూజ చేస్తారు. తెలుగు రాష్ట్రాల సాంప్రదాయం ప్రకారం..... వర్ష రుతువులో జేష్ఠ్య పౌర్ణమి రోజున.... పూజలు నిర్వహిస్తారు. ఆ పున్నమి రోజును ఏరువాక పర్వదినంగా జరుపుకుంటారు. తొలకరి జల్లుల ఆగమనంతో.... ఆనందోత్సాహాల మధ్య అరక దున్నటంతో పొలం పనులు ప్రారంభిస్తారు. ఆడపడుచులు పుట్టింటికి వచ్చి ఆనందంగా గడుపుతారు.

ఎడ్లను అలంకరిస్తారు

ఏరువాక పర్వదినాన కర్షకుల కుటుంబాల్లో పండుగ వాతావరణం నెలకొంటుంది. ఎడ్లకు శుభ్రంగా స్నానం చేయించి... కొమ్ములకు రంగులు పూస్తారు. మెడ, కాళ్లకు గంటలు కట్టి అలంకరిస్తారు. వాటికి పొంగలి ఆహారంగా పెడతారు. అనంతరం రైతులు సామూహికంగా పొలాలకు వెళ్లి దుక్కి దున్నుతారు. పున్నమి నాడు పూజలు చేయడం వల్ల ఆ సంవత్సరమంతా పంటలు సమృద్ధిగా పండుతాయని అన్నదాతలు విశ్వసిస్తారు.

ఎడ్ల పందేలు

మరికొన్ని ప్రాంతాల్లో ఊరు బయట.... రైతులు గోగునారతో చేసిన తోరం కడతారు. రైతులందరూ అక్కడికి చేరి చెర్నాకోలతో ఆ తోరాన్ని కొట్టి ఎవరికి దొరికిన నార వారు తీసుకెళ్తారు. ఆ నారను నాగళ్లు, ఎడ్ల మెడలో కడతారు. అలా చేయడం కారణంగా వ్యవసాయం, పశు సంపద వృద్ధి చెందుతుందని నమ్ముతారు. ఈ పర్వదినాన ఎడ్ల పందేలు కూడా నిర్వహిస్తారు. ఎడ్లను బాగా అలంకరించి... వాటికి బరువైన రాళ్లు కట్టించి పరుగులు తీయిస్తారు. వాటి వెనుక యువకులు పరుగులు తీస్తారు. దీన్ని బండలాగుడు పోటీ అంటారు. ఏరువాక పున్నమి రోజున రైతుల ఇళ్లలో పనిచేసే జీతగాళ్ల సంవత్సరం ముగిసి కొత్త సంవత్సరం మొదలవుతుంది.

ఇదీ చదవండి:JURALA: ఎగువ ప్రాంతాల్లో భారీ వర్షాలు.. జూరాలకు జలకళ