కొవిడ్ మార్గదర్శకాల అమలులో రాజీవద్దు: సబిత

బుధవారం నుంచి ఆరు, ఏడు, ఎనిమిది తరగతులు ప్రారంభం కానున్నందున విద్యాశాఖ మంత్రి సబితా ఇంద్రారెడ్డి సమీక్ష నిర్వహించారు. ఈ సమావేశంలో విద్యాశాఖ ముఖ్య కార్యదర్శి చిత్ర రామచంద్రన్, పాఠశాల విద్యా శాఖ సంచాలకులు శ్రీదేవసేన, ఇతర ఉన్నతాధికారులు పాల్గొన్నారు.

పాఠశాలల నిర్వహణలో కొవిడ్ మార్గదర్శకాల అమలులో ఎట్టి పరిస్థితుల్లో రాజీ పడవద్దని విద్యాశాఖ మంత్రి సబితా ఇంద్రారెడ్డి స్పష్టం చేశారు. అవసరమైతే ప్రభుత్వ, ప్రైవేట్ పాఠశాలల్లో షిఫ్టు విధానాన్ని పాటించవచ్చని మంత్రి తెలిపారు. తల్లిదండ్రుల అనుమతి తప్పనిసరిగా తీసుకోవాలని... కచ్చితంగా ప్రత్యక్ష తరగతులకు హాజరుకావాలని విద్యార్థులపై ఒత్తిడి చేయవద్దని పాఠశాల యాజమాన్యాలకు సబితా ఇంద్రారెడ్డి స్పష్టం చేశారు.

వారికి ఆన్​లైన్ బోధన...

ప్రత్యక్ష తరగతులకు హాజరు కాని విద్యార్థుల కోసం ఆన్​లైన్ బోధన కొనసాగించాలన్నారు. రేపటి నుంచి ఆరు, ఏడు, ఎనిమిది తరగతులు ప్రారంభం కానున్నందున విద్యా శాఖ ప్రత్యేక ముఖ్య కార్యదర్శి చిత్ర రామచంద్రన్, పాఠశాల విద్యా శాఖ సంచాలకురాలు శ్రీదేవసేన, ఇతర ఉన్నతాధికారులతో మంత్రి సమీక్ష నిర్వహించారు. స్థానిక పరిస్థితుల ఆధారంగా రేపటి నుంచి మార్చి 1 వరకు ప్రారంభించుకోవచ్చని మంత్రి సూచించారు. విద్యార్థులు తప్పనిసరిగా మాస్క్ ధరించి భౌతిక దూరం పాటించాలని మంత్రి కోరారు.

అవసరాన్ని బట్టి...

ఆరు, ఏడు, ఎనిమిది తరగతుల్లో రాష్ట్రవ్యాప్తంగా సుమారు 17 లక్షల10 వేల మంది విద్యార్థులు ఉన్నారని వెల్లడించారు. ప్రభుత్వ బడుల్లో 8 లక్షల 891 వేల 742 మంది, ప్రైవేట్ పాఠశాలల్లో 8 లక్షల 28 వేల 516 మంది... గురుకులాల్లో లక్షా 98 వేల 853 మంది చదువుతున్నారని మంత్రి తెలిపారు. అవసరాన్ని బట్టి విద్యా వాలంటీర్లు, పార్ట్ టైం ఉపాధ్యాయులను విధుల్లోకి తీసుకొనే అంశం పరిశీలిస్తామన్నారు.

ఇదీ చూడండి:'విద్యార్థులూ.. ఈ మూడింటిపై దృష్టి పెట్టండి'