పాఠశాలలు విద్యార్థుల ప్రవేశాలు నిర్వహించుకోవచ్చని ఆంధ్రప్రదేశ్ పాఠశాల విద్యాశాఖ వెల్లడించింది. సెప్టెంబరు 4 వరకు ప్రత్యామ్నాయ క్యాలెండరును విడుదల చేసింది. ప్రైవేటు, ఎయిడెడ్, ప్రభుత్వ పాఠశాలలు ఈ క్యాలెండరును పాటించాలని శనివారం జారీ చేసిన ఆదేశాల్లో పేర్కొంది.
సెప్టెంబరు 5న పాఠశాలలు పునః ప్రారంభంకానున్న దృష్ట్యా అప్పటివరకు ఈ ప్రత్యామ్నాయ క్యాలెండరు అనుసరించాలని ఆదేశించింది. ఈ వ్యవధిలో విద్యార్థుల సామర్థ్యాలు, ప్రవేశాలు, ఆన్లైన్ తరగతుల నిర్వహణకు తగిన చర్యలు తీసుకోవాలని పాఠశాల విద్యాశాఖ జిల్లా అధికారులకు సూచించింది. క్యాలెండరులోని వివరాలిలా..
ప్రవేశాలు నిర్వహించుకోవచ్చు
- కరోనా నిబంధనలు ఉల్లంఘించకుండా పాఠశాలలు 2020-21 విద్యాసంవత్సరానికి ప్రవేశాలు చేపట్టవచ్చు.
- ఉత్తీర్ణులైన విద్యార్థులు ఏ పాఠశాలల్లో చేరాలనుకుంటున్నారో తల్లిదండ్రుల ద్వారా తెలుసుకొని వాటి ప్రకారం ప్రవేశాలు చేపట్టాలి.
- వలస వెళ్లి తిరిగొచ్చిన కుటుంబాల పిల్లల విషయంలో గుర్తింపు కోసం తప్ప ఇతర ఎలాంటి ధ్రువీకరణ పత్రాలు అవసరం లేదు.
- 1 నుంచి 8వ తరగతి విద్యార్థులకు ఎలాంటి పరీక్షలు నిర్వహించకూడదు. విద్యార్థి అభ్యసన సామర్థ్యాలు సాధించారా? లేదా? అన్నది పరిశీలించాలి.
- 9, 10 తరగతుల విద్యార్థులకు అంతర్గత మదింపు చేపట్టవచ్చు. ఇవి కూడా ప్రత్యామ్నాయ క్యాలెండరుకు సంబంధించినవై ఉండాలి. విద్యాసంవత్సరం మొదలుకాలేదు కాబట్టి సిలబస్ ప్రకారం పరీక్షలు నిర్వహించకూడదు.