Diwali Celebrations: దీపావళి పండుగను ప్రజలంతా ఆనందోత్సాహాల మధ్య జరుపుకున్నారు. చార్మినార్ వద్ద ఉన్న భాగ్యలక్ష్మీ అమ్మవారిని దర్శించుకోవడానికి భక్తులు భారీగా తరలివచ్చారు. దీపావళి పర్వదినాన అమ్మవారిని ప్రత్యేకంగా అలంకరించారు. భక్తులకు ఎలాంటి ఇబ్బందులు కలగకుండా అన్ని ఏర్పాట్లు చేశారు. మంత్రి తలసాని శ్రీనివాస్‌ యాదవ్‌ నివాసంలో వేడుకలు ఉత్సాహంగా జరిగాయి. కుటుంబ సభ్యులతో కలిసి టపాసులు పేల్చారు.
సికింద్రాబాద్ బోయిన్‌పల్లిలోని క్యాంపు కార్యాలయంలో కుటుంబ సభ్యులతో కలిసి కార్మికశాఖ మంత్రి మల్లారెడ్డి దీపావళి వేడుకలు జరుపుకున్నారు. సంప్రదాయ దుస్తులు ధరించిన మంత్రి ప్రత్యేక పూజలు చేశారు. అనంతరం కార్యాలయం వెలుపల టపాసులు కాల్చారు. కరీంనగర్ జిల్లా చొప్పదండి ఎమ్మెల్యే సుంకె రవిశంకర్.. తన క్యాంపు కార్యాలయంలో దీపావళి పండగను ఘనంగా నిర్వహించారు.
ప్రత్యేక పూజల అనంతరం దీపాలు వెలిగించారు. కుటుంబ సభ్యులతో కలిసి టపాసులు కాల్చారు. ఖమ్మంలోని తన నివాసంలో సత్తుపల్లి ఎమ్మెల్యే సండ్ర వెంకట వీరయ్య ఉత్సవాల్లో పాల్గొన్నారు. కుటుంబ సభ్యులతో కలిసి టపాసులు కాల్చారు. హనుమకొండలో ఇంటిల్లిపాది టపాసులు పేల్చుతూ ఉత్సాహంగా గడిపారు. ఇంటి ముందు దీపాలతో అందంగా అలకరించారు.