గాలి ద్వారా కొవిడ్ వైరస్.. జాగ్రత్తగా ఉండాలన్న డీహెచ్

కరోనా మహమ్మారి గాలి ద్వారా కూడా వ్యాపిస్తోందని డీహెచ్​ శ్రీనివాసరావు స్పష్టం చేశారు. ప్రజలు అప్రమత్తంగా లేకపోతే భవిష్యత్తులో తెలంగాణ మరో మహారాష్ట్ర అయ్యే ప్రమాదం ఉందని హెచ్చరించారు. గతంతో పోలిస్తే వైరస్ వేగంగా విస్తరిస్తోందని వివరించారు.

ప్రస్తుత పరిస్థితుల్లో కరోనా మహమ్మారి గాలి ద్వారా కూడా వ్యాపిస్తోందని ప్రజారోగ్య సంచాలకులు​ శ్రీనివాసరావు స్పష్టం చేశారు. అప్రమత్తంగా ఉండకపోతే మహారాష్ట్ర పరిస్థితే మనకూ వస్తుందని హెచ్చరించారు. రాష్ట్రంలో లాక్‌డౌన్‌ పెట్టలేదంటే పరిస్థితి తీవ్రంగా లేదని కాదన్న ఆయన.. పరిస్థితి ఇలాగే కొనసాగితే ఆస్పత్రుల్లో పడకల కొరత వస్తుందన్నారు.

ఈ సందర్భంగా గతంతో పోలిస్తే వైరస్​ వేగంగా విస్తరిస్తోందని డీహెచ్​ పేర్కొన్నారు. ఇంట్లో ఒకరికి కరోనా సోకితే గంటల్లోనే మిగతా వారికీ వ్యాపిస్తోందని తెలిపారు. మరో 4-6 వారాలు పరిస్థితులు ఇలాగే ఉంటాయన్న ఆయన.. ఇంట్లో ఉన్నా సరే మాస్క్ ధరించాల్సిందేనని స్పష్టం చేశారు. ప్రజలు స్వీయ నియంత్రణ పాటించకపోతే పరిస్థితి విషమిస్తుందని హెచ్చరించారు.