బీటెక్‌, బీఫార్మసీ చివరి ఏడాది విద్యార్థులకు హాజరు ఆధారిత డిటెన్షన్‌ను రద్దు చేస్తున్నట్లు హైదరాబాద్ జేఎన్‌టీయూ ప్రకటించింది. కరోనా పరిస్థితుల కారణంగా 2020-21 విద్యా సంవత్సరంలో రెండు సెమిస్టర్లు పూర్తిగా ఆన్లైన్లోనే బోధించిన నేపథ్యంలో ఈ నిర్ణయం తీసుకున్నట్టు వర్సిటీ ప్రకటించింది. ఆన్‌లైన్‌ తరగతులు లేదా మిడ్‌ పరీక్షలకు హాజరుకాని విద్యార్థులను డిటెయిన్‌ చేయాలని కళాశాల యాజమాన్యం నిర్ణయించే పక్షంలో సదరు విద్యార్థి హాల్‌టికెట్లను ముందుగానే వర్సిటీ రిజిస్ట్రేషన్‌ పోర్టల్‌లో అప్‌లోడ్‌ చేయాలని ఆ ప్రకటనలో పేర్కొంది.
ఫైనలియర్ విద్యార్థులకు ఊరట.. హాజరు ఆధారిత డిటెన్షన్ రద్దు
ఇంజినీరింగ్‌, ఫార్మసీ ఫైనలియర్ విద్యార్థులకు హైదరాబాద్ జవహర్లాల్ నెహ్రూ టెక్నోలాజికల్ యూనివర్సిటీ వెసులుబాటు కల్పించింది. చివరి ఏడాదిలో హాజరు ఆధారిత డిటెన్షన్ రద్దు చేస్తున్నట్లు ప్రకటించింది. కరోనా కారణంగా 2020-21 విద్యాసంవత్సరంలో రెండు సెమిస్టర్లు ఆన్లైన్లోనే బోధించడం వల్ల ఈ నిర్ణయం తీసుకున్నట్లు తెలిపింది.
జవహర్లాల్ నెహ్రూ టెక్నోలాజికల్ యూనివర్సిటీ
వచ్చే నెల 14 నుంచి జరగనున్న బీటెక్‌/బీఫార్మసీ చివరి ఏడాది పరీక్షల రుసుం చెల్లింపునకు సంబంధించి జేఎన్‌టీయూ సోమవారం నోటిఫికేషన్‌ విడుదల చేసింది. రెగ్యులర్‌, సప్లిమెంటరీ పరీక్షలకు దరఖాస్తు చేసుకునేందుకు ఈ నెల 29వతేదీ చివరి తేదీగా నిర్ణయించింది. రూ.100 ఆలస్య రుసుంతో వచ్చే నెల ఒకటో తేదీలోపు దరఖాస్తు చేసుకోవచ్చు. వచ్చే నెల 4లోపు రూ.1000, 9లోగా రూ.2000, 12లోగా రూ.5000, పరీక్షలు ముగిసేవరకు రూ.10 వేల ఆలస్య రుసుంతో దరఖాస్తు చేసుకోవచ్చు.