Dengue Fever Symptoms : డెంగీ జ్వరం వచ్చిందా.. ఈ లక్షణాలున్నాయా.. ఏం చేయాలంటే..?

Dengue Fever Symptoms : వానకాలంలో దోమల బెడద ఎక్కువగా ఉంటుంది. వీటితో జబ్బుల భయమూ మొదలైంది. ముఖ్యంగా అందరినీ కలవపరిచే విషయం డెంగీ జ్వరం. చాలావరకు ఇది మామూలుగా తగ్గే జ్వరమైనా.. కొందరికిది ప్రాణాంతకంగానూ మారుతుంది. ప్రస్తుతం డెంగీ 2 రకం వైరస్‌ ఎక్కువగా వస్తోంది. దీంతో రక్తకణాల సంఖ్య పడిపోవటం ఆందోళన కలిగిస్తోంది. మరి డెంగీ జర్వం రాకుండా ఎలాంటి నివారణ చర్యలు తీసుకోవాలి.. మీకు వచ్చిందా డెంగీ జ్వరమేనా ఎలా తెలుసుకోవాలి.. ఓసారి చూద్దాం.

Dengue Fever Symptoms :డెంగీకి మూలం ఫ్లేవీవైరస్‌లు. వీటిల్లో ఉపజాతులున్నాయి. ఇవి ఆడ ఈజిప్టై దోమ కుట్టటం వల్ల మనుషులలో వ్యాపిస్తాయి. దోమలో వైరస్‌ ఉన్నా కొన్నిసార్లు జ్వరం రాదు . కొందరికి తెలియకుండానే ఎప్పుడో ఒకసారీ డెంగీ ఇన్‌ఫెక్షన్‌ వచ్చి ఉండొచ్చు. దీంతో వైరస్‌ను తట్టుకునే విధంగా యాంటీబాడీలు శరీరంలో వృద్ధిచెంది డెంగీ జ్వరం రాకుండా కాపాడతాయి.

Dengue Fever Symptoms :డెంగీ లక్షణాలు

• ఉన్నట్టుండి తీవ్రమైన జ్వరం
• కళ్ల వెనక నుంచి నొప్పి
• వాంతి, వికారం
• ఒళ్లు, కీళ్ల నొప్పులు
• రక్తంలో హిమటోక్రిట్‌ (హిమోగ్లోబిన్‌) ఎక్కువవటం.
• అదే సమయంలో ప్లేట్‌లెట్లు వేగంగా పడిపోవటం.
• కడుపు నొప్పి, ఆయాసం
• పొట్టలో లేదా ఛాతీలో నీరు పోగుపడటం
• విడవకుండా వాంతులు
• చిగుళ్ల వంటి భాగాల నుంచి రక్తం రావటం
• చర్మం మీద ఎర్రటి చుక్కల్లాంటి మచ్చలు
• రక్తపోటు పడిపోవటం, అపస్మారం

Dengue Fever Treatment :డెంగీ జ్వరం వచ్చిన తొలిదశలో పారాసిటమాల్‌ మాత్రలు వేస్తే తగ్గిపోతుంది. వాంతులు లేకపోతే ఓఆర్‌ఎస్‌ ద్రావణాన్ని పట్టించాలి. తీవ్రస్థాయిలో వాంతులు అవుతుంటే.. వాటిని తగ్గించే మందులతో పాటు ఓఆర్‌ఎస్‌ ద్రావణాన్ని తాగించాలి. అప్పటికీ తగ్గకపోతే.. ముఖ్యంగా పిల్లలను డాక్టర్​ వద్దకు తీసుకెళ్లాలి. రక్తంలో ప్లేట్‌లెట్ల సంఖ్య బాగా తగ్గటం, రక్తం చిక్కబడటం వంటివి గలవారికి తరచూ రక్తం చిక్కదనాన్ని తెలిపే హిమటోక్రిట్‌/ప్యాక్డ్‌ సెల్‌ వాల్యూమ్‌, ప్లేట్‌లెట్ల సంఖ్య తెలుసుకోవటానికి రక్తపరీక్షల వంటివి చేస్తూ జాగ్రత్తగా కనిపెట్టుకోవాలి.

Dengue Fever Tests : డెంగీ జ్వరం తెలుసుకోవాడానికి నిర్ధారణ పరీక్షలు అవసరం. జ్వరం వచ్చిన మొదటి 1-5 రోజుల్లో.. ఎన్‌ఎస్‌1 యాంటీజెన్‌ పరీక్ష పరీక్ష చేయించాలి. ఒకవేళ రిజల్ట్​ పాజిటివ్‌గా వచ్చినట్లయితే డెంగీ ఉన్నట్టే. జ్వరం మొదలైన 5 రోజుల అనంతరం ఐజీఎం యాంటీబాడీ పరీక్ష అవసరం. వేగంగా ఫలితాలనిచ్చే ర్యాపిడ్‌ డయాగ్నస్టిక్‌ పరీక్షల్లో డెంగీ ఉన్నట్టు తేలినా ప్రామాణిక పరీక్షలతోనే నిర్ధారించుకోవటం ముఖ్యం. అవసరమైతే ఐజీజీ యాంటీబాడీ పరీక్ష చేయాల్సి ఉంటుంది.

Preventive Measures Against Dengue Fever : డెంగీ వచ్చాక ఇబ్బందులు పడటం కన్నా రాకుండా జాగ్రత్త పడటమే ఉత్తమం. దోమలు కుట్టకుండా చూసుకుంటే డెంగీని పూర్తిగా నివారించుకోవచ్చు. డెంగీ దోమలు నిల్వ ఉన్న నీటిలో పెరుగుతాయి. కాబట్టి ఇంటి చుట్టుపక్కల నీరు నిల్వ ఉండకుండా చూసుకోవాలి. పాత టైర్లు, డబ్బాలు వంటివి ఉంటే వెంటనే తొలగించేయాలి. డెంగీ దోమలు సాధారణంగా పగటి పూటే చురుకుగా ఉంటాయి. కాబట్టి పగటి పూట నిద్రించేటప్పుడు మంచానికి దోమతెరలు వాడుకోవాలి. ఇంట్లోకి దోమలు రాకుండా మెష్​ బిగించుకోవాలి.