ప్రియుడితో కలిసి భర్తను కడతేర్చిన మహిళ..!

ఏపీ ప్రకాశం జిల్లాకు చెందిన ఓ వ్యక్తి అనుమానస్పద మృతి కేసును పోలీసులు ఛేదించారు. ప్రియుడి మోజులో భార్యే అతన్ని హత్య చేసినట్లు వెల్లడించారు.

ఏపీ ప్రకాశం జిల్లా సంతమాగులూరు గ్రామానికి చెందిన ఓ మహిళ ప్రియుడితో కలిసి భర్తను కడతేర్చినట్లు పోలీసులు పేర్కొన్నారు. వివరాల్లోకి వెళ్తే.. గ్రామానికి చెందిన సైదాలక్ష్మి కూలీ పనులు చేస్తుంది. ఈ క్రమంలో గుంటూరు జిల్లా నరసరావుపేట మండలం జొన్నలగడ్డ గ్రామానికి చెందిన నల్లగంగుల వెంకటరెడ్డి(ఆటో డ్రైవర్)తో పరిచయం ఏర్పడింది. అది కాస్తా వివాహేతర సంబంధానికి దారితీసింది. విషయం తెలుసుకున్న భర్త శ్రీనివాసరావు.. వెంకటరెడ్డిని మందలించాడు. ఈ విషయమై వెంకటరెడ్డి, సైదాలక్ష్మి ఇద్దరు కలిసి శ్రీనివాసరావును అడ్డు తొలగించుకోవాలనుకున్నారు.

పథకం ప్రకారం..

ఈ నెల 25 రాత్రి మద్యం మత్తులో ఉన్న శ్రీనివాసరావు.. భార్యతో గొడవ పడి పడుకున్నాడు. పథకం ప్రకారం అర్థరాత్రి సమయంలో సైదా లక్ష్మి, ప్రియుడితో కలసి.. భర్త గొంతు నులిమి చంపేసింది. అనంతరం దానిని ఆత్మహత్యగా చిత్రీకరించే ప్రయత్నం చేసింది.

ఫిర్యాదుతో వెలుగులోకి...

మృతుడి తమ్ముడు వీరయ్య ఈ ఘటనపై అనుమానంతో పోలీసులకు ఫిర్యాదు చేశారు. కేసు నమోదు చేసుకున్న పోలీసులు మృతదేహానికి పోస్టుమార్టం నిర్వహించగా.. గొంతు నులిమి చంపినట్లు నివేదికలో తెలింది. దీంతో భార్యను అదుపులోకి తీసుకొని విచారించగా తానే ప్రియుడితో కలిసి.. భర్తను హత్య చేసినట్లు ఒప్పుకొంది. నిందితురాలిని అరెస్ట్ చేసిన పోలీసులు రిమాండ్​కు తరలించారు. పరారీలో ఉన్న వెంకటరెడ్డి కోసం గాలిస్తున్నారు.

ఇదీ చదవండి:పేగు బంధం మరిచి.. ప్రియుడితో కలిసి కన్నకొడుకునే చంపిన తల్లి