అమెజాన్‌ గిఫ్ట్​ ఓచర్ల పేరుతో అధ్యాపకురాలికి బురిడీ

జనం నాడి ఆధారంగా ఎప్పటికప్పుడు మోసాల శైలిని మారుస్తున్న సైబర్‌ నేరగాళ్లు తాజాగా ఈ-కామర్స్‌ దిగ్గజం అమెజాన్‌ కంపెనీ పేరునూ తమ నేరాలకు వాడుకుంటున్నారు. చివరకు విద్యను అందించే గురువును సైతం వదల్లేదు.

హైదరాబాద్ నారాయణగూడలోని ఒక మహిళా కళాశాలలో పనిచేసే ఓ అధ్యాపకురాలికి ప్రిన్సిపాల్ పంపించినట్లు ఒక మెయిల్ వచ్చింది. తనకు అత్యవసరంగా డబ్బులు కావాలని... వెంటనే అమెజాన్​లో 25 వేల బహుమతుల కూపన్లు (గిఫ్ట్ ఓచర్లు) కొని పంపించాలని ఈ మెసేజ్ సారాంశం. వెంటనే గిఫ్ట్ ఓచర్లు కొని పంపించింది.

తర్వాత మరో 30వేల విలువ చేసే గిఫ్ట్ ఓచర్లు పంపించాలని ఇంకో మెయిల్ వచ్చింది. ఆమెకు అనుమానం వచ్చి వెంటనే ప్రిన్సిపాల్​కు ఫోన్ చేసి ఆరా తీసింది. ఇదంతా మోసమని.. తాను ఎవరికీ మెయిల్ పంపించలేదని తెలిపారు. ఆమె షాక్​కు గురైంది. వెంటనే హైదరాబాద్ సైబర్ క్రైమ్ పోలీసులకు ఫిర్యాదు చేసింది. పోలీసులు కేసు దర్యాప్తు చేస్తున్నారు.