ఆశ కల్పించి.. అందినంత దోచేసి

సేవల పేరుతో ఎవరైనా ఫోన్‌లు చేస్తే.. సమస్యలను పరిష్కరిస్తామని.. ఓటీపీలు, లింక్‌లను పంపించమని సైబర్​ కేటుగాళ్లు బ్యాంకు ఖాతాలను కొల్లగొడుతున్నారు.

భాగ్యనగరంలో ఒకవైపు కరోనా మహమ్మారి విజృంభిస్తోంటే...మరోవైపు సైబర్​ నేరగాళ్లు రెచ్చుపోతున్నారు. ఆశ చూపించి అందినంత దోచేసుకుంటున్నారు. బుధవారం నగర సైబర్‌క్రైమ్‌ పోలీస్‌స్టేషన్‌కు వచ్చిన ఫిర్యాదులివి.

• రాజస్థాన్‌కు చెందిన స్నేహితులు అంబర్‌పేటలో నివాసముంటున్నారు. రెండు రోజుల క్రితం ‘ఫేస్‌బుక్‌ మార్కెట్‌ ప్లేస్‌’ పేరుతో అంతర్జాలంలో వచ్చిన ప్రకటనలో మారుతి స్విఫ్ట్‌ కారును చూశారు. రూ.1.40లక్షలు అమ్మకానికి పెట్టగా ఆ పోస్టు చేసిన వ్యక్తితో సంప్రదింపులు జరిపారు. తాను ఆర్మీ అధికారిగా పరిచయం తీసుకున్నాడు. మీరుంటున్న ప్రాంతానికే కారు పంపిస్తానని ముందుగా నగదు పంపించాలని సూచించారు. దీంతో రెండు దఫాలుగా రూ.43 వేలు చెల్లించారు.
• సికింద్రాబాద్‌కు చెందిన ఓ వ్యక్తి ఓఎల్‌ఎక్స్‌లో ఓ కారు చూశారు. కొనుగోలు చేసేందుకు రూ.1.30 లక్షలు ఒప్పందం చేసుకున్నారు. రూ.75 వేలు వారి బదిలీ చేశారు. అదే ప్రాంతానికి చెందిన మరోవ్యక్తి కూడా రూ.58వేలు ఖాతాలో వేసి మోసపోయారు.
• బంజారాహిల్స్‌కు చెందిన ఓ వ్యక్తి ఓఎల్‌ఎక్స్‌ యాప్‌లో స్కూటీ వాహనాన్ని కొనుగోలు చేయాలని రూ.23 వేల వాహనానికి రూ.43వేలు ఖాతాలో వేశారు.
• డిష్‌ టీవీ రిఛార్జ్‌ కోసం ఓ వెబ్‌సైట్‌లో వచ్చిన ఫోన్‌ నంబర్‌ ఆధారంగా చరవాణికి పంపిన లింక్‌ను ఓపెన్‌ చేసి రూ.15,700 పోగొట్టుకున్నారు.
• ఇంటికే మద్యం పంపిస్తామని చెప్పగా నమ్మి మరో వ్యక్తి రూ.9వేలు మోసపోయారు.