వైద్యారోగ్య శాఖలో ఖాళీలను త్వరగా భర్తీ చేయాలని... తగినన్ని మందులు నిల్వ ఉండేలా చూడాలని అధికారులను ప్రభుత్వ ప్రధాన కార్యదర్శి సోమేశ్ కుమార్ ఆదేశించారు. డయోగ్నోస్టిక్, బయోమెడికల్ పరికరాలు, టెస్టింగ్ కిట్లు, ఇతర నిత్యావసరాలను అందుబాటులో ఉంచాలని సూచించారు. ముఖ్యమంత్రి కేసీఆర్ ఆదేశాల మేరకు... వైద్యారోగ్య శాఖలో మౌలిక సదుపాయాల బలోపేతంపై అధికారులతో సీఎస్ సమీక్షించారు. వైద్యారోగ్య శాఖలో ఇప్పటికే ఉన్న ఖాళీలను త్వరితగతిన భర్తీ చేయాలని సీఎస్ అధికారులను ఆదేశించారు.
వాటి సంఖ్య పెంచాలి
వైద్యం, మౌలిక సదుపాయాల అభివృద్ధికై తీసుకున్న చర్యలను అధికారులు వివరించారు. ఆక్సిజన్ జనరేషన్‌ ప్లాంట్ల ఏర్పాటు, ప్రభుత్వ ఆసుపత్రుల్లోని పడకలన్నింటిని ఆక్సిజన్ బెడ్లుగా మార్పు, లిక్విడ్ మెడికల్ ఆక్సిజన్ అదనపు నిల్వ సామర్థ్యాన్ని పెంచడం, పీడియాట్రిక్ ఆక్సిజన్, ఐసీయూ పడకల సంఖ్యను పెంచాలని సీఎస్ సూచించారు. జిల్లా ఆసుపత్రుల బలోపేతం, అప్‌గ్రేడ్‌ చేయడం వంటి అంశాలపై సమావేశంలో చర్చించారు.
వర్షాకాలంలో వచ్చే సీజనల్ వ్యాధులకు తగిన చికిత్స చేసేలా అన్ని చర్యలు తీసుకోవాలన్నారు. మూడో దశ వచ్చినా... సమర్థంగా ఎదుర్కొనేలా సిద్ధంగా ఉండాలన్నారు. ఇటీవల కొత్తగా మంజూరు చేసిన ఏడు వైద్య కళాశాలల పురోగతిపైనా సీఎస్ చర్చించారు.
ఇదీ చూడండి:CM KCR Phone Call: హుజూరాబాద్పై కేసీఆర్ మాస్టర్ ప్లాన్.. ఆడియో వైరల్