కరోనా మహమ్మారి కట్టడి వ్యాక్సినేషన్‌తోనే సాధ్యమని ప్రభుత్వాలు భావిస్తున్నాయి. మూడో దశ వస్తుందన్న ఆందోళనతో ప్రతిఒక్కరికీ టీకాలు అందించాలని సర్కారు యోచిస్తోంది. నాలుగు వారాల నుంచి రాష్ట్రంలో వ్యాక్సినేషన్ ప్రక్రియ జోరుగా సాగుతోంది. నిత్యం లక్ష మందికిపైగా టీకా తీసుకుంటున్నారని అధికారిక గణాంకాలు వెల్లడిస్తున్నాయి. సోమవారం ఏకంగా లక్షా 66 వేల 818 మందికి వ్యాక్సిన్‌ వేసుకున్నట్లు ప్రభుత్వం తెలిపింది. రాష్ట్రంలో మొత్తం 54 లక్షల 13వేల 379మందికి తొలి డోస్ టీకా పంపిణీ పూర్తైంది. మరో 14 లక్షల 48 వేల 736 మందికి రెండు డోసులు అందించినట్లు వెల్లడించింది.
రోజుకు లక్ష మందికి పైగా...
రాష్ట్రంలో టీకాల కొరత కారణంగా మే 11 నుంచి మొదటి డోసును పూర్తిగా నిలిపివేసిన సర్కారు.... పదిహేను రోజులు నుంచి సెకండ్ డోసు మాత్రమే పంపిణీ చేసింది. ఆ సమయంలో రోజుకి సగటున 30 నుంచి 40వేల మందికి మాత్రమే టీకాలు ఇచ్చింది. టీకా కోసం ప్రజలు ఎదురుచూస్తున్న క్రమంలో వ్యాక్సినేషన్ ప్రక్రియ వేగవంతం చేసేందుకు సీఎం కేసీఆర్ ఆదేశాల మేరకు అధికారులు చర్యలు తీసుకున్నారు. ప్రైవేటు సంస్థలు తమ ఉద్యోగులకు టీకాలను అందించేందుకు అనుమతులు జారీ చేశారు. రాష్ట్రవ్యాప్తంగా 7 లక్షల 75 వేల మంది సూపర్ స్ప్రెడర్లను గుర్తించి.. వారికి గత నెల 28 నుంచి టీకాలను అందిస్తున్నారు. ప్రైవేటు ఆస్పత్రులు నేరుగా ఫార్మా కంపెనీలతో ఒప్పందం కుదుర్చుకుని... ప్రత్యేక వ్యాక్సినేషన్ డ్రైవ్‌లు నిర్వహిస్తున్నాయి. ఈనెల 1వ తేదీ నుంచి రోజుకి సరాసరిన లక్షా 17వందల మందికి టీకా అందుతోంది.
వేగం పుంజుకున్న వ్యాక్సినేషన్