హైదరాబాద్‌ చింతల్‌బస్తీకి చెందిన ఓ మహిళ కొవిడ్‌ బారినపడ్డారు. వైద్యుని సూచనల మేరకు ఇంట్లో ఉండి చికిత్స పొందుతున్నారు. మందుల కోసం కుటుంబ సభ్యులు సమీపంలోని అన్ని ఔషధ దుకాణాలు తిరిగారు. దాదాపు అన్నిచోట్లా జింకు, విటమిన్‌ సి మాత్రలు లేవనేశారు. అజిథ్రోమైసిన్‌కూ అదే పరిస్థితి. చివరకు వైద్యుని సూచనల మేరకు సెఫిక్సిమ్‌ కొనాల్సి వచ్చింది.
గత రెండు నెల్లలో కొవిడ్‌ విజృంభణ తీవ్రస్థాయికి చేరుకోగా ఇదే సమయంలో ఔషధ వినియోగం కూడా రెట్టింపైంది. కొవిడ్‌ వచ్చిన తొలి రోజుల్లో వినియోగిస్తున్న యాంటీ వైరల్‌ ఔషధం.. ఫావిపిరావిర్‌ కాగా ఈ మాత్రలను ప్రధానంగా ఐదారు పేరున్న సంస్థలు ఉత్పత్తి చేస్తున్నాయి. కొందరు వైద్యులు మాత్రం ఒకే కంపెనీకి చెందిన మాత్రలను సూచిస్తున్నారని నిపుణులు చెబుతున్నారు. నిజానికి అన్ని మాత్రలు ఒకే విధంగా పనిచేస్తాయి. ఒకే రకమైన ఫలితం కూడా లభిస్తుంది.
ఒక్కసారిగా డిమాండ్..
ఆసుపత్రుల్లో చేరి చికిత్స పొందే వారి కంటే ఇళ్లలో ఉంటూ చికిత్స పొందేవారు 70 శాతానికి పైగా ఉంటున్నారు. యూట్యూబ్‌ల్లో, వాట్సప్‌ గ్రూపుల్లో ఎక్కడబడితే అక్కడ, ఎవరు పడితే వారు కొవిడ్‌ చికిత్సకు సంబంధించిన ఔషధాలను సూచిస్తున్నారు. మొదటి వారంలో ఏ మందులు వాడాలో.. జ్వరం తగ్గకపోతే రెండోవారంలో ఏ మందులు వాడాలో కూడా చెబుతున్నారు. ఇందులో స్టెరాయిడ్‌ల ప్రాధాన్యం గురించి కూడా ఎక్కువ ప్రచారం జరగడంతో డిమాండ్ గణనీయంగా పెరిగింది. పైగా ఈ మందులేమీ బాగా ఖరీదైనవి కూడా కావు. డెక్సామెథజోన్‌ ఔషధమైతే 0.5 మి.గ్రా.లతో కూడిన 10 మాత్రలు రూ.3 లోపే. వీటిని కొందరికి రోజుకు 3 మిల్లీ గ్రాములు... మరికొందరికి 4 మిల్లీ గ్రాముల చొప్పున సుమారు 10 రోజుల వరకూ సూచిస్తుంటారు. కానీ ఇవి కూడా సరిగా అందుబాటులో లేవు. ఇదే విధంగా ప్రజల వినియోగానికి తగినట్లుగా ఉత్పత్తి జరగకపోతే మున్ముందు పారాసెటమాల్‌కు కూడా కొరత ఏర్పడే అవకాశం ఉందని నిపుణులు చెబుతున్నారు. రెండు నెలల్లో ఒక్కసారిగా కొవిడ్‌ ఔషధాలకు డిమాండ్ పెరిగిపోవడమనేది ఔషధ సంస్థలు కూడా ఊహించలేదు. మార్చి వరకూ మహమ్మారి అదుపులోనే ఉండడం, కేసుల సంఖ్య 500 లోపే నమోదవుతుండడంతో.. అవి కూడా ఉత్పత్తిని పెంచడంపై దృష్టిపెట్టలేదు. ఇంత డిమాండ్‌ను అంచనా వేయలేకపోయాయి.