కలవర పెడుతున్న కరోనా... భాగ్యనగరంపై కొవిడ్ పంజా

గ్రేట‌ర్ హైద‌రాబాద్​లో కరోనా విజృంభణ ఏమాత్రం తగ్గడం లేదు. జీహెచ్​ఎంసీ పరిధిలోనే దాదాపు వెయ్యికి పైగా కేసులు నమోదవుతూ ఆందోళన కలిగిస్తోంది. కుత్బుల్లాపూర్‌, అంబర్‌పేట్‌ నియోకవర్గాల్లో వైరస్ ఉద్ధృతి కొనసాగుతోంది. కొవిడ్‌ మృతుల సంఖ్య కూడా నానాటికీ పెరుగుతూ ప్రజలను మరింత భయాందోళనలకు గురిచేస్తోంది.

హైదరాబాద్​లో కరోనా మరింత వేగంగా వ్యాపిస్తోంది. ప్రతిరోజూ భారీ సంఖ్యలో కేసులు నమోదవుతున్నాయి. తాజాగా సుల్తాన్ బజార్ ఏసీపీకి వైరస్​ సోకినట్లు వైద్యులు నిర్ధరించారు. జీహెచ్​ఎంసీ యూసుఫ్ గూడ -19 పరిధిలో కొత్తగా 40 మందికి పాజిటివ్​గా తేలింది. కుత్బుల్లాపూర్ నియోజకవర్గం పరిధిలో 38 కరోనా కేసులు నమోదయ్యాయి. చింతల్ పరిధిలో 10 కేసులు నమోదవగా, జీడీమెట్ల పరిదిలో ఏడుగురు వైరస్ బారినపడ్డారు.

జగద్గిరిగుట్ట, గాజులరామరం, బాచూపల్లి, కుత్బుల్లాపూర్, కొంపల్లి, సంజయ్ గాంధీ నగర్, ప్రగతి నగర్, షాపూర్ నగర్ ప్రాంతాల్లో కేసులు నమోదవుతూనే ఉన్నాయి. కుత్బుల్లాపూర్​లోని సురారం-సాయిబాబా నగర్​కు చెందిన 63 ఏళ్ల వృద్ధుడు కరోనాతో మృతి చెందాడు. ఆ నియోజకవర్గంలో ఇప్పటి వరకు 345 మంది కరోనా బారిన పడగా... 12 మంది ప్రాణాలు కోల్పోయారు.

అంబర్​పేట నియోజక వర్గ పరిధిలో కొత్తగా 19 కరోనా పాజిటివ్ కేసులు నమోదయ్యాయి. మరో ముగ్గురు మరణించారు. ఇందులో కాచిగూడ పరిధిలో ఇద్దరు, అంబర్​పేట బతుకమ్మకుంటలో ఒకరు గాంధీలో చికిత్స పొందుతూ ప్రాణాలు కోల్పోయారు. మూసాపేట్ సర్కిల్​లో 80, కూకటపల్లి సర్కిల్​లో 32 కరోనా కేసులు నమోదయ్యాయి. బోడుప్పల్ నగరపాలక సంస్థ పరిధిలో ఐదుగురు వైరస్ బారినపడినట్లు అధికారులు నిర్ధరించారు.

ఇదీ చూడండి:టికెటింగ్‌ కంపెనీల ఆదాయం ఫట్‌.. వేతనాల్లో భారీ కోతలు