Congress MLA Candidates Second List in Telangana 2023 : మొదటి జాబితా విడుదలైన తర్వాత పెద్దఎత్తున అసంతృప్తి చెలరేగుతుందని.. రాష్ట్ర కాంగ్రెస్(Congress) అంచనా వేసినా అలాంటిదేమీ జరగలేదు. నాలుగైదు చోట్ల కొందరు అసంతృప్తి వ్యక్తం చేయగా.. మరికొందరు అధికారంలోకి వచ్చాక లబ్ది చేకూరుతుందని భావించి.. వెనక్కి తగ్గినట్లు తెలుస్తోంది. ఇప్పటికే బీఆర్ఎస్ టికెట్లు ప్రకటించడం సహా బీజేపీలో గెలిచే అవకాశాలు లేవన్న ప్రచారంతో.. పార్టీలోనే ఉండాల్సిన పరిస్థితి నెలకొందని కాంగ్రెస్ వర్గాలు అంచనా వేస్తున్నాయి. అభ్యర్ధుల ఎంపిక కోసం.. నాలుగుసార్లు సమావేశమైన స్క్రీనింగ్‌ కమిటీ దాదాపు 110 నియోజకవర్గాలకు కసరత్తు పూర్తిచేయగా.. తొలి విడతలో 55 స్థానాలకు అభ్యర్థులకు ప్రకటించింది.
Congress Second List in Telangana 2023 : మిగిలిన 64 స్థానాల్లో 9 మినహా అన్నింటిపై కసరత్తు పూర్తైనట్లు సమాచారం. ఆ 9 చోట్ల వామపక్షాలతో పొత్తు, ఐదాగురుగురు పార్టీలో చేరేవారుండడంతో పక్కన పెట్టినట్లు తెలుస్తోంది. ఆ విషయంపై ఇప్పటికే సంప్రదింపులు జరుగుతున్నట్లు తెలిపిన కాంగ్రెస్.. నాలుగైదు రోజుల్లో మొత్తం కొలిక్కి వచ్చే అవకాశం ఉందని భావిస్తోంది. దాదాపు 30 చోట్ల అభ్యర్థుల ఎంపికలో.. తీవ్రమైనపోటీ నెలకొనడంతో ఏకాభిప్రాయం సాధించిన తర్వాత ప్రకటించడం మంచిదని పీసీసీ, ఏఐసీసీ భావిస్తోంది.
Congress Bus Yatra in Telangana: ఎన్నికల ప్రచారంలో పాల్గొనేందుకు పార్టీ అగ్రనేతలు రాహుల్ గాంధీ, ప్రియాంకగాంధీ.. ఈనెల 18 నుంచి మూడ్రోజులపాటు రాష్ట్రంలో పర్యటించనున్నారు. ఈనెల 18న.. రామప్ప దేవాలయంలో శివుడికి ప్రత్యేక పూజలు చేసి.. బస్సుయాత్ర ద్వారా ప్రచారం ప్రారంభించనున్నారు. అదే రోజు భూపాలపల్లిలో మహిళలతో.. ఈనెల 19న రామగుండంలో సింగరేణి కార్మికులతో.. ప్రత్యేక సమావేశాలు ఉంటాయని పీసీసీ అధ్యక్షుడు రేవంత్‌రెడ్డి(Revanth Reddy) ప్రకటించారు. 20న జగిత్యాల, బోధన్, నిజామాబాద్‌లలో.. బస్సుయాత్ర, సభలుంటాయని తెలిపారు. రాష్ట్రంలో మూడు విడతలుగా బస్సు యాత్రనిర్వహించాలని నిర్ణయించినట్లు చెప్పారు.