Cong Leaders On Agnipath: అగ్నిపథ్కు వ్యతిరేకంగా దేశమంతా ఉద్యమం జరుగుతోందని.. ఇక్కడ రాజకీయ జోక్యం లేదని కాంగ్రెస్ నేతలు అన్నారు. అగ్నిపథ్ రద్దు చేయాలని డిమాండ్ చేస్తూ ఏఐసీసీ ఇచ్చిన పిలుపు మేరకు పీసీసీ ఆధ్వర్యంలో గాంధీభవన్‌లో సత్యాగ్రహ దీక్షను ప్రారంభించారు. పార్లమెంటులో బిల్లు పెట్టి చర్చించకుండా.. డిఫెన్స్‌లో కొత్త విధానాన్ని ఏవిధంగా తీసుకొస్తారని ప్రశ్నించారు. మోదీ క్షమాపణలు చెప్పి అగ్నిపథ్‌ని వెనక్కి తీసుకోవాలని డిమాండ్ చేశారు.
దేశమంతా నిరసనలతో అట్టుడుకుతోందని.. దేశాన్నిరక్షించే జవానుకే ఇప్పుడు కష్టం వచ్చిందని ఆరోపించారు. మోదీ తెచ్చే ప్రతి పథకం తన స్నేహితులు అదాని, అంబానీల కోసమేనని ధ్వజమెత్తారు. పెన్షన్లు ఇవ్వాల్సి వస్తుందని నాలుగేళ్లకే తీసుకోవడం అన్యాయమన్నారు. ఈ దీక్షలో కాంగ్రెస్ సీనియర్‌ నేత వి.హనుమంతురావు, మాజీ మంత్రి గీతారెడ్డి, పీసీసీ సీనియర్‌ ఉపాధ్యక్షుడు మల్లు రవి, మాజీ మంత్రి చిన్నారెడ్డి పాల్గొన్నారు.
దమ్ముంటే వరంగల్ రండి: జగ్గారెడ్డి
సికింద్రాబాద్‌ ఘటనపై భాజపా నాయకుల తీరును పీసీసీ వర్కింగ్‌ ప్రెసిడెంట్‌ జగ్గారెడ్డి తీవ్రంగా తప్పుబట్టారు. గాంధీభవన్‌లో చేపట్టిన సత్యాగ్రహ దీక్షలో పాల్గొన్న జగ్గారెడ్డి భాజపా నాయకులకు సవాల్‌ విసిరారు. ధైర్యం ఉంటే కిషన్ రెడ్డి, బండి సంజయ్ వరంగల్ రావాలని సవాల్‌ విసిరారు. అగ్నిపథ్ రద్దయ్యే వరకు బండి సంజయ్, కిషన్ రెడ్డిలను కాంగ్రెస్ అడ్డుకుంటుందని ఆయన స్పష్టం చేశారు. అగ్నిపథ్ ఉద్యమం భాజపా పాలిత రాష్ట్రాలైన యూపీ, బిహార్‌, మధ్యప్రదేశ్‌ రాష్ట్రాల్లో ప్రారంభమైందని ఆగ్రహం వ్యక్తం చేశారు. సికింద్రాబాద్‌ కాల్పుల ఘటనకు బాధ్యులు ఎవరని ఆయన ప్రశ్నించారు. మృతుడు రాకేష్‌ మృతదేహంపై తెరాస జండాను ఎలా కప్పుతారని ఆయన ప్రశ్నించారు. కరోనాతో బాధపడుతున్న సోనియాగాంధీ సైతం అగ్నిపథ్ విషయంలో పోరాటం చేస్తున్న యువతకు కాంగ్రెస్ అండగా ఉంటుందని స్పష్టం చేసినట్లు తెలిపారు. యువత ఎవరు కూడా తొందరపడి బలికావద్దని విజ్ఞప్తి చేశారు.