తెలంగాణ అసెంబ్లీ ఎన్నికలు - ఈసీకి వెల్లువెత్తిన ఫిర్యాదులు

Complaints to EC on Telangana Elections 2023 : రాష్ట్రంలో ఎన్నికల వేళ ఈసీకి ఫిర్యాదులు వెల్లువెత్తుతున్నాయి. రాజకీయ పార్టీలు, అభ్యర్థులు.. ఒకరిపై ఒకరు ఈసీకి ఫిర్యాదు చేస్తున్నారు. డబ్బు, మద్యం ఇతరత్రాలతో ఓటర్లను ప్రలోభాలకు గురి చేస్తున్నారంటూ వివరించారు. ప్రచారం సమయంలో తీవ్ర విమర్శలు, దూషణలు చేసుకుంటున్నారని కొందరు.. తమకు కేటాయించిన గుర్తులు చిన్నవిగా ఉన్నాయని మరికొందరు ఫిర్యాదుల్లో పేర్కొన్నారు. ఎన్నికల నిబంధనలు ఉల్లంఘించిన వారిపై కేసులు నమోదు చేయాలని ఫిర్యాదుదారులు డిమాండ్ చేస్తున్నారు.

Complaints to EC on Telangana Elections 2023: కాంగ్రెస్ పార్టీ ఎన్నికల నిబంధనలను ఉల్లంఘిస్తోందని భారత రాష్ట్ర సమితి ఆరోపించింది. ఈ మేరకు బీఆర్ఎస్ ప్రతినిధి బృందం.. రాష్ట్ర ప్రధాన ఎన్నికల అధికారివికాస్‌రాజ్‌ను కలిసి.. ఆరు అంశాలపై ఫిర్యాదు చేసింది. పీసీసీ అధ్యక్షుడు రేవంత్ రెడ్డి హింసను రెచ్చగొట్టేలా మాట్లాడుతున్నారని గతంలోనే ఫిర్యాదు చేసినా.. ఇప్పటికీ ఎలాంటి చర్యలు తీసుకోలేదని వెల్లడించింది.

BRS Legal Team Complaint To EC Against Revanth Reddy : రేవంత్ వ్యాఖ్యలపై 11 వీడియోల ఆధారాలతో ఫిర్యాదు చేశామని.. చర్యలు తీసుకోకపోతే ప్రజల వద్దకు వెళతామని బీఆర్ఎస్ నేతలు స్పష్టం చేశారు. అనుమతి రద్దు చేసిన ప్రకటనలను కాంగ్రెస్ పార్టీ సినిమా హాళ్లలో ప్రదర్శిస్తోందని వివరించారు. క్రెడిట్, డెబిట్ కార్డుల తరహాలో కాంగ్రెస్ పార్టీ గ్యారంటీ కార్డులను పంపిణీ చేస్తోందన్న గులాబీ నేతలు.. ప్రజలను తప్పుదోవ పట్టిస్తున్న కాంగ్రెస్‌పై చర్యలు తీసుకోవాలని కోరారు. మైనంపల్లి హన్మంతరావు నోటికొచ్చినట్లు మాట్లాడుతున్నారని.. ఆయన వ్యాఖ్యలపై ఈసీ, పోలీసు అధికారులు చర్యలు తీసుకోవాలని విజ్ఞప్తి చేశారు.

BSP Leader Complaint To EC Against KCR : గజ్వేల్‌ నియోజకవర్గ బీఆర్ఎస్ అభ్యర్థి, సీఎం కేసీఆర్.. తన ఎన్నికల అఫిడవిట్‌లో ఆస్తుల గురించి తప్పుడు సమాచారం పొందుపరిచారని ఆ నియోజకవర్గం బీఎస్పీ అభ్యర్థి సంజయ్‌కుమార్‌ ఆరోపించారు. ప్రజలను, చట్టాన్ని.. కేసీఆర్‌ తప్పుదోవ పట్టిస్తున్నారన్నారని ఆయన విమర్శించారు. కేసీఆర్ నామినేషన్, అఫిడవిట్ పై విచారణ జరిపి చర్యలు తీసుకోవాలన్న సంజయ్‌.. ఈ మేరకు రాష్ట్ర ఎన్నికల ప్రధాన అధికారి వికాస్‌రాజ్‌ను కలిసినట్లు వెల్లడించారు.

Indipendent Candidates Complaint To Ec: కామారెడ్డిలో ఈవీఎం బ్యాలెట్‌లలో స్వతంత్ర అభ్యర్థుల గుర్తులు చిన్న సైజులో ముద్రించారని.. దీని వల్ల ఓటర్లు ఆయా గుర్తులను సరిగ్గా చూడలేకపోతారని స్వతంత్ర అభ్యర్థి బరిగెల శివ ఆరోపించారు. ఈ మేరకు ఈసీకి ఫిర్యాదు చేశారు. ఎన్నికల్లో పోటీ చేసే చిన్న పార్టీలపై ప్రభుత్వం, అధికారులు చిన్న చూపు చూస్తున్నారని మన తెలంగాణ రాష్ట్ర సమైక్య పార్టీ.. గజ్వేల్‌ నియోజకవర్గ అభ్యర్థి అశోక్‌ ఆరోపించారు. ఈవీఎం బ్యాలెట్‌లో తమ పార్టీ గుర్తు కూడా చిన్న సైజులో ముద్రించారని.. ఈ మేరకు ఈసీకి ఫిర్యాదు చేశామన్నారు. మొత్తంగా ఎన్నికల నిబంధనలు ఉల్లంఘించిన వారిపై వెంటనే తగిన చర్యలు తీసుకుని.. కేసులు నమోదు చేయాలని ఫిర్యాదుదారులు ఈసీకి విజ్ఞప్తి చేస్తున్నారు.