Complaint on government hospitals : కాన్పునకు వచ్చిన మహిళ నుంచి రూ.2 వేలు వసూలు చేసిన ఆసుపత్రి సిబ్బంది నిర్వాకం మరోసారి బయట పడింది. తన వద్ద ముక్కుపిండి మరీ డబ్బులు తీసుకున్నారని ఓ మహిళ వైద్యారోగ్య శాఖ మంత్రి హరీశ్రావు వద్ద వాపోయింది. పేట్లబుర్జు ప్రసూతి ఆసుపత్రిలో తల్లిపాల బ్యాంకును ప్రారంభించేందుకు శుక్రవారం మంత్రి హరీశ్రావు అక్కడికి చేరుకున్నారు. బాలింతలు, గర్భిణులను ఒకచోట సమావేశ పరిచి వారి ఇబ్బందులను ఆయన అడిగి తెలుసుకున్నారు.
ఈ సందర్భంగా తన వద్ద డబ్బుల్లేవని వేడుకున్నా, ఆసుపత్రి సిబ్బంది రూ.2 వేలు బలవంతంగా వసూలు చేశారని పాతబస్తీకి చెందిన బాలింత తస్రీమాబేగం మంత్రి దృష్టికి తెచ్చింది. అత్యవసర ఖర్చుల కోసం తన తల్లి ఇచ్చిన డబ్బులనూ తీసుకున్నారని కన్నీమున్నీరైంది. మంత్రి ఆసుపత్రి సిబ్బంది తీరుపై ఆగ్రహం వ్యక్తం చేశారు. సూపరింటెండెంట్‌ డాక్టర్‌ మాలతిని వివరణ కోరారు. ఇకపై ఇలాంటి సంఘటనలు జరిగితే ఎవరైనా ఉపేక్షించొద్దని, అలాంటి వారిని ఇంటికి పంపడమే కాకుండా పోలీసు కేసూ పెట్టాలని ఆదేశించారు. శానిటేషన్‌, ఇతర ఖర్చులకు పడకకు రూ.700 కేటాయిస్తున్నా రోగుల నుంచి వసూలు చేయాల్సిన అవసరం ఏమొచ్చిందని ప్రశ్నించారు. సిబ్బంది చేతివాటం వల్ల ఆసుపత్రికే చెడ్డ పేరు వస్తోందని, మానుకోవాలని హితవు పలికారు.