కరోనా కోరల్లోంచి బయటపడినా.. కొన్నిసార్లు అది బాధితుల శరీరంలో సృష్టించిన అలజడుల ఛాయలు వేధిస్తున్నాయి. ముఖ్యంగా ఎక్కువ కాలం ఆక్సిజన్‌ అవసరమైనవారిలో కొందర్ని శ్వాసకోశ సమస్యలు చుట్టుముడుతున్నాయి. ఊపిరితిత్తుల్లో గట్టిదనం (ఫైబ్రోసిస్‌) ఏర్పడుతుండగా.. ఏదో ఒక సమస్యతో మళ్లీ ఆసుపత్రికి రావాల్సిన పరిస్థితులు ఎదురవుతున్నాయి. లక్షణాలు తీవ్రమైతే ఆలస్యం చేయకుండా అత్యవసర చికిత్స పొందాలని వైద్యనిపుణులు సూచిస్తున్నారు.
సాధారణంగా ఊపిరితిత్తులు స్పాంజ్‌ మాదిరిగా పనిచేస్తుంటాయి. అయితే, వైరస్ దుష్ప్రభావం కారణంగా అవి గట్టిపడతాయి. దీన్నే వైద్యపరిభాషలో ‘ఫైబ్రోసిస్‌’ అంటారు. ఫలితంగా ప్రాంతం గట్టిపడి, శ్వాసకోశాల సంకోచ, వ్యాకోచాలు తగ్గిపోతాయి. రక్తంలోకి ఆక్సిజన్‌ను పంపించే ప్రక్రియ మందగిస్తుంది. ఫలితంగా రక్తంలో ప్రాణవాయువు తగ్గిపోయి ఆయాసం వస్తుంది. ఈ సమస్యకు తగిన మందులు వాడడం ద్వారా ఎక్కువమందికి ప్రమాదకరంగా మారదు.
ఆలస్యంగా చికిత్స పొందినవారిలో..
కరోనా బారినపడ్డ తర్వాత ఆలస్యంగా చికిత్స పొందేవారు.. కోలుకున్న తర్వాత మరోసారి ఆసుపత్రికి రావాల్సిన అవసరం ఏర్పడుతోందని నిపుణులు విశ్లేషిస్తున్నారు. చికిత్సలో జాప్యం వల్ల తొలివారంలో వైరస్ తీవ్రత పెరుగుతుంది. ఆ ప్రభావంతో రెండోవారంలో సైటోకైన్స్‌ ఉప్పెనలా దాడి చేస్తాయి. ఫలితంగా శ్వాసకోశాలు, గుండెపై దుష్ప్రభావం పడుతుంది.
ఇన్‌ఫెక్షన్ల ముప్పు
స్టెరాయిడ్స్‌ ఇవ్వడంతో కోలుకున్న తర్వాత కొందరిలో రక్తంలో చక్కెర స్థాయులు పెరుగుతాయి. ఫలితంగా బ్యాక్టీరియా, ఫంగల్‌ ఇన్‌ఫెక్షన్ల బారినపడుతుంటారు. కొంతమందిలో రెండోసారి నిమోనియా కూడా వస్తోందని నిపుణులు చెబుతున్నారు. వయసు పైబడినవారికి గుండె వైఫల్య సమస్య కూడా ఎదురవుతుంది. వైద్యుల సూచనల మేరకు ఔషధాలు వాడాలి.
కోలుకున్న తర్వాత ఎదురయ్యే సమస్యలు
- తలనొప్పి
- ఒళ్లునొప్పులు
- నీరసం
- దగ్గు
- ఆకలి లేకపోవడం
- 99-99.5 డిగ్రీల జ్వరం వచ్చి పోతూ ఉండటం
- ఈ సమస్యలన్నీ క్రమేణా మందులతో తగ్గుతాయి.
కొందరిలో తీవ్రం
- రక్తంలో చక్కెర స్థాయి పెరగడం
- తీవ్ర ఆయాసం
- గుండె దడ
- ఛాతిలో పట్టేసినట్లుగా ఉండడం
- గుండె, ఊపిరితిత్తుల్లో సమస్యలు
ఎప్పుడు ప్రమాదమని గుర్తించాలి?
- కొవిడ్‌ నుంచి కోలుకున్న తర్వాతా.. నడిచినప్పుడు ఆయాసంగా ఉండడం
- చేతులు నీలిరంగులోకి మారడం
- జ్వరం మళ్లీ మళ్లీ వస్తుండడం
- దగ్గు నిరంతరంగా కొనసాగడం, క్రమేణా పెరుగుతుండడం
- రక్తంలో ఆక్సిజన్‌ శాతం 90-94 కంటే తగ్గడం
- ఈ లక్షణాలు కనిపిస్తే వెంటనే ఆసుపత్రిలో చికిత్స పొందాలి.