యూపీఎస్సీ తరహాలో టీఎస్‌పీఎస్సీని తీర్చిదిద్దేందుకు సహకరించండి - మనోజ్​ సోనితో సీఎం రేవంత్​ రెడ్డి

CM Revanth Reddy Delhi Tour Updates : యూపీఎస్సీ తరహాలో టీఎస్‌పీఎస్సీని పటిష్ఠంగా రూపొందించేందుకు సహకరించమని ముఖ్యమంత్రి రేవంత్‌ రెడ్డి యూపీఎస్సీ ఛైర్మన్‌ మనోజ్‌ సోనిని కోరారు. సానుకూలంగా స్పందించిన సోని, ఆ మేరకు సాయం చేస్తామన్నారు. రక్షణ భూములు బదలాయించాలని రాజ్‌నాథ్‌ సింగ్‌కు, వెనుకబడిన ప్రాంతాల అభివృద్ధి నిధుల కోసం నిర్మలా సీతారామన్‌కు విజ్ఞప్తి చేశారు. దిల్లీలో రెండు రోజుల పర్యటన ముగించుకున్న సీఎం రాష్ట్రానికి చేరుకున్నారు.

CM Revanth Reddy Delhi Tour Updates: రాష్ట్ర పబ్లిక్‌ సర్వీస్‌ కమిషన్‌ (టీఎస్​పీఎస్సీ)ను యూనియన్‌ పబ్లిక్‌ సర్వీస్‌ కమిషన్‌(యూపీఎస్సీ) తరహాలో పటిష్ఠమైన వ్యవస్థగా మార్చాలని నిర్ణయించామని, అందుకు సహకరించాలని ముఖ్యమంత్రి రేవంత్‌రెడ్డి యూపీఎస్సీ ఛైర్మన్‌ మనోజ్‌ సోనిని కోరారు. దిల్లీ పర్యటనలో ఉన్న ముఖ్యమంత్రి శుక్రవారం రాష్ట్ర నీటి పారుదల శాఖ మంత్రి ఉత్తమ్‌ కుమార్‌ రెడ్డి, ప్రభుత్వ ప్రధాన కార్యదర్శి శాంతి కుమారిలతో కలిసి యూపీఎస్సీ భవన్‌లో ఛైర్మన్‌ మనోజ్‌ సోని, కార్యదర్శి శశిరంజన్‌ కుమార్‌లతో భేటీ అయ్యారు. యూపీఎస్సీ ఎప్పటికప్పుడు నోటిఫికేషన్లు విడుదల చేసి, నిర్దిష్ట కాల పరిమితిలోగా పరీక్షలు, ఇంటర్వ్యూలు నిర్వహించి పారదర్శకంగా నియామక ప్రక్రియ పూర్తి చేయడం అభినందనీయమని ప్రశంసించారు.

Revanth Reddy Meet UPPSC Chairman : యూపీఎస్సీ తరహాలో తెలంగాణ పబ్లిక్‌ సర్వీస్‌ కమిషన్‌ను తీర్చిదిద్దే అంశంపై గంటన్నర పాటు సీఎం ఛైర్మన్​(Revanth Reddy Explained TSPSC Position)తో చర్చించారు. అవినీతి మరక అంటకుండా నియామకాలు పూర్తి చేయడానికి యూపీఎస్సీ అనుసరిస్తున్న విధానాల గురించి ముఖ్యమంత్రి అడిగి తెలుసుకున్నారు. తాము ఈ ఏడాది డిసెంబరు నాటికి 2 లక్షల ఉద్యోగ నియామకాలు చేపట్టాలని భావిస్తున్నామని, ఇందుకు తగ్గట్టు టీఎస్​పీఎస్సీని సంపూర్ణంగా ప్రక్షాళన చేయాలనుకుంటున్నామని ఆయన దృష్టికి తీసుకెళ్లారు. యూపీఎస్సీ ఛైర్మన్‌ సోని ముఖ్యమంత్రి ప్రయత్నాన్ని అభినందించడంతో పాటు యూపీఎస్సీ సభ్యుల నియామకంలో అనుసరిస్తున్న విధానాన్ని రేవంత్‌రెడ్డికి వివరించారు. సభ్యుల నియామకంలో రాజకీయ ప్రమేయం ఉండదని, సమర్థత ఆధారంగా ఎంపిక జరుగుతుందని తెలిపారు. రాష్ట్ర ప్రభుత్వ నిర్ణయాలను యూపీఎస్సీ ఛైర్మన్‌ స్వాగతించారు. టీఎస్​పీఎస్సీ ఛైర్మన్‌తో పాటు, సభ్యులకు తాము శిక్షణ ఇస్తామని హామీ ఇచ్చారు.

Revanth Reddy Meet Defense Minister Rajnath Singh: హైదరాబాద్‌లో రహదారులు, ఎలివేటెడ్‌ కారిడార్ల నిర్మాణానికి రక్షణ శాఖ పరిధిలో ఉన్న భూములు కేటాయించాలని ముఖ్యమంత్రి రేవంత్‌రెడ్డి రక్షణ శాఖ మంత్రి రాజ్‌నాథ్‌సింగ్‌ను కోరారు. ఉత్తమ్‌ కుమార్‌ రెడ్డి(Uttam Kumar Reddy)తో కలిసి ఆయన శుక్రవారం సాయంత్రం కేంద్రమంత్రితో భేటీ అయ్యారు. ట్రాఫిక్‌ రద్దీ నివారణ కోసం మెహిదీపట్నం రైతుబజార్‌ వద్ద స్కైవాక్‌ నిర్మిస్తున్నామని, ఇందుకోసం అక్కడ రక్షణ శాఖకున్న 0.21 హెక్టార్ల భూమిని బదలాయించాలని కోరారు. అందుకు రక్షణ మంత్రి సుముఖత వ్యక్తం చేశారు. హైదరాబాద్‌-రామగుండం రాజీవ్‌ రహదారిలో ప్యారడైజ్‌ జంక్షన్‌ నుంచి ఔటర్‌ రింగ్‌రోడ్డు జంక్షన్‌ వరకు ఆరు వరుసల ఎలివేటెడ్‌ కారిడార్‌ ప్రవేశ, నిష్క్రమణ ర్యాంపులతో కలిపి 11.30 కిలోమీటర్ల కారిడార్‌ నిర్మాణానికి 83 ఎకరాల రక్షణ శాఖ భూమిని బదిలీ చేయాలని రాజ్‌నాథ్‌కు రేవంత్‌ విజ్ఞప్తి చేశారు.

Revanth Reddy on Telangana Development: నాగ్‌పుర్‌ హైవేపై కండ్లకోయ సమీపంలోని ప్యారడైజ్‌ జంక్షన్‌ నుంచి అవుటర్‌ రింగ్‌ రోడ్డు వరకు 18.30 కిలోమీటర్ల ఎలివేటెడ్‌ కారిడార్‌ను ప్రతిపాదించామని రక్షణ మంత్రి దృష్టికి తీసుకెళ్లారు. అందులో 12.68 కిలోమీటర్ల మేర 6 వరుసల ఎలివేటెడ్‌ కారిడార్‌ ఉంటుందని, దానికి 4 ప్రాంతాల్లో ప్రవేశ, నిష్క్రమణ మార్గాలు, మెట్రో కోసం డబుల్‌ డెక్కర్‌ కారిడార్‌ నిర్మాణం(Double Dekkar Caridor For Metro in Hyderabad) చేపట్టడానికి 56 ఎకరాల రక్షణ శాఖ భూమిని బదలాయించాలని విజ్ఞప్తి చేశారు. సైనిక పాఠశాల ఏర్పాటు చేయాలనీ కోరారు. రాజ్‌నాథ్‌ సానుకూలంగా స్పందించారు.

CM Revanth Reddy Meet Finance Minister Nirmala Sitharaman : విభజన చట్టంలో ఇచ్చిన హామీ మేరకు తెలంగాణలోని వెనుకబడిన ప్రాంతాల అభివృద్ధికి రూ.1,800 కోట్లు విడుదల చేయాలని ముఖ్యమంత్రి రేవంత్‌ రెడ్డి కేంద్ర ఆర్థిక మంత్రి నిర్మలా సీతారామన్‌ను కోరారు. 15వ ఆర్థిక సంఘం సిఫార్సుల మేరకు తెలంగాణకు రావాల్సిన రూ.2,233.54 కోట్లు త్వరగా విడుదల చేయాలని కోరారు. హైదరాబాద్‌ అభివృద్ధికి ప్రత్యేకంగా నిధులు కేటాయించాలని విజ్ఞప్తి చేశారు. వరుస భేటీల తర్వాత ముఖ్యమంత్రి రేవంత్‌ రెడ్డి హైదరాబాద్‌కు తిరుగు పయనమయ్యారు. రెండు రోజుల పర్యటనలో ఆయన ఐదుగురు కేంద్ర మంత్రులను కలిసి రాష్ట్ర సమస్యలపై వినతి పత్రాలు సమర్పించారు.