భారీ పెట్టుబడులే టార్గెట్ - నేటి నుంచి సీఎం రేవంత్ దావోస్ పర్యటన

CM Revanth Reddy Davos Tour Today : భారీ పెట్టుబడులే లక్ష్యంగా ముఖ్యమంత్రి రేవంత్​రెడ్డి బృందం నేటి నుంచి దావోస్​లో పర్యటించనుంది. రాష్ట్రంలో పారిశ్రామిక అనుకూల పరిస్థితులను ప్రపంచ ఆర్థిక సదస్సులో సీఎం వివరించనున్నారు. నాలుగు రోజుల పర్యటనలో సుమారు 70 మంది పారిశ్రామికవేత్తలతో బృందం చర్చించనుంది. రాష్ట్రంలో పెట్టుబడులపై ఒప్పందాలు కూడా జరిగే అవకాశం ఉంది. దావోస్ పర్యటన ముగిసిన తర్వాత సీఎం రేవంత్​రెడ్డి లండన్ వెళ్లనున్నారు.

CM Revanth Reddy Davos Tour Today : రాష్ట్రానికి పెట్టుబడులను ఆకర్షించడమే లక్ష్యంగా ముఖ్యమంత్రి రేవంత్​రెడ్డి నేతృత్వంలోని ఉన్నత స్థాయి బృందం దావోస్ వెళ్లింది. నేటి నుంచి ఈనెల 19 వరకు స్విట్జర్లాండ్‌లోని దావోస్‌లో జరిగే 54వ ప్రపంచ ఆర్థిక సదస్సుకు వివిధ దేశాలకు చెందిన ప్రభుత్వ, పారిశ్రామిక ప్రతినిధులు హాజరుకానున్నారు. ప్రపంచ ఆర్థిక సదస్సును రాష్ట్రానికి పెట్టుబడులను ఆకర్షించే వేదికగా వినియోగించుకోవాలన్న లక్ష్యంతో రాష్ట్ర బృందం వెళ్లింది.

CM Revanth Visits Davos Today :పర్యటనలో సుమారు 70 మందికి పైగా పారిశ్రామికవేత్తలు, సీఈవోలతో సమావేశమై చర్చించనున్నారు. నొవర్తీస్, మెడ్ ట్రానిక్స్, ఆస్ట్రాజనిక, గూగుల్, యుబర్, మాస్టర్ కార్డ్, బేయర్, ఎల్డీసీ, యూపీఎల్ తదితర అంతర్జాతీయ కంపెనీల ప్రతినిధులను కలువనున్నారు. భారత్‌కు చెందిన టాటా, విప్రో, హెచ్‌సీఎల్ టెక్, జేఎస్ డబ్ల్యూ, గోద్రెజ్, ఎయిర్ టెల్, బజాజ్ వంటి సంస్థల ప్రతినిధులతోనూ భేటీ కావడంతో పాటు సీఐఐ, నాస్కం వంటి వ్యాపార ఛాంబర్స్ ప్రతినిధులతో చర్చించనున్నారు. వరల్డ్ ఎకనామిక్ ఫోరం అధ్యక్షుడు బ్రెండే బోర్జ్‌తో సీఎం బృందం సమావేశం కానుంది. ఫార్మా, ఎలక్ట్రానిక్స్, డేటా సెంటర్లు, డిఫెన్స్ అండ్ ఏరోస్పేస్, ఆహార శుద్ధి, పునరుత్పాదక ఇంధనం వంటి రంగాల్లో పెట్టుబడుల ఒప్పందాలపై సంతకాలు చేసే అవకాశం ఉందని మంత్రి శ్రీధర్​బాబు వెల్లడించారు.

CM Revanth Reddy Davos On Investment Deals :సీఎం రేవంత్​రెడ్డితో పాటు పరిశ్రమల శాఖ మంత్రి శ్రీధర్​బాబు, ముఖ్య కార్యదర్శి జయేశ్​ రంజన్, పెట్టుబడుల ప్రోత్సహ ప్రత్యేక కార్యదర్శి విష్ణువర్ధన్ రెడ్డి, సీఎంవో ఉన్నతాధికారులు శేషాద్రి, అజిత్​రెడ్డి, భద్రతా అధికారులు తఫ్సీర్ ఇక్బాల్, చక్రవర్తి, సహాయకుడు ఉదయ్ సింహా దావోస్‌ వెళ్లారు. వరల్డ్ ఎకనామిక్ ఫోరం కాంగ్రెస్ సెంటర్​లో జరగనున్న చర్చగోష్టిలో పురోగమిస్తున్న వైద్యరంగంపై సీఎం రేవంత్​రెడ్డి మాట్లాడనున్నారు.

ఫుడ్ సిస్టమ్స్ అండ్ లోకల్ యాక్షన్ అనే అంశంపై జరగనున్న అత్యున్నత స్థాయి సదస్సులో రేవంత్​రెడ్డి పాల్గొని ఆగ్రి - ఎకానమీపై వాతావరణ మార్పుల ప్రభావం, రైతుల జీవనోపాధిని పరిరక్షించడానికి వాతావరణం ప్రకారం సాగే వ్యవసాయాన్ని ప్రోత్సహించే చర్యలపై ముఖ్యమంత్రి ప్రసంగిస్తారు. ఏఐ పరిశ్రమ వర్గాలు నిర్వహించే చర్చా వేదికలో 'డెవలపింగ్ స్కిల్స్ ఫర్ ఏఐ' అనే అంశంపై మంత్రి శ్రీధర్​బాబు మాట్లాడతారు.

CM Revanth Attends World Economic Forum in Davos :తెలంగాణలో పెట్టుబడులు పెట్టడానికి ఉన్న అనుకూలతలు, బలాబలాలు, తమ ప్రాధాన్యతలను వరల్డ్ ఎకనామిక్ ఫోరం వేదిక ద్వారా చాటి చెబుతామని మంత్రి శ్రీధర్​బాబు తెలిపారు. తెలంగాణ ఆవిర్భావం తర్వాత దావోస్ సమావేశానికి వెళ్తున్న రాష్ట్ర అధికారిక బృందానికి ముఖ్యమంత్రి నేతృత్వం వహించడం ఇది తొలిసారి అని మంత్రి పేర్కొన్నారు. ఐటీ, లైఫ్ సైన్సెస్ హబ్‌గా ఉన్న తెలంగాణ బలాలను ప్రపంచానికి చాటి చెప్పి పెట్టుబడులను ఆకర్షించడానికి ఇది చక్కటి వేదిక అన్నారు.

హెల్త్ కేర్ అండ్ లైఫ్ సైన్సెస్ రంగంలో వరల్డ్ ఎకనామిక్ ఫోరానికి సంబంధించిన సీ4ఐఆర్ సదస్సు హైదరాబాదులోనే జరగనుందని శ్రీధర్​బాబు తెలిపారు. వ్యవసాయం, ఆహార శుద్ధి రంగాల్లో సాంకేతిక ఉపక్రమణలకు ఆ సంస్థ క్రియాశీలకంగా మద్దతిస్తోందని పేర్కొన్నారు. దావోస్ పర్యటన ముగిసిన తర్వాత సీఎం రేవంత్​రెడ్డి లండన్ వెళ్తారు. మూసీ అభివృద్ధి కోసం లండన్‌లోని థేమ్స్ నదిపై అభివృద్ధి, పర్యాటకాన్ని పరిశీలించడంతో పాటు పలు కంపెనీ ప్రతినిధులను కలువనున్నారు.