ఫూలే ఆలోచనా విధానాన్నే ప్రభుత్వం అమలుచేస్తోంది: కేసీఆర్​

విద్య, సమానత్వం ద్వారానే సామాజిక, ఆర్థిక సమున్నతికి బాటలు పడతాయన్న మహాత్మా జ్యోతిబా ఫూలే ఆలోచనా విధానాన్నే తెలంగాణ ప్రభుత్వం అమలుచేస్తోందని ముఖ్యమంత్రి కేసీఆర్​ పేర్కొన్నారు. రేపు ఫూలే జయంతిని పురస్కరించుకుని నివాళులు అర్పించారు. ఆయన సేవలను స్మరించుకున్నారు.

తెలంగాణ రాష్ట్ర ప్రభుత్వం చేపడుతున్న కార్యాచరణ వెనక మహాత్మా జ్యోతిబా ఫూలే వంటి దార్శనికుల స్ఫూర్తి ఇమిడి ఉందని ముఖ్యమంత్రి కేసీఆర్ పేర్కొన్నారు. ఆదివారం ఫూలే 195వ జయంతి సందర్భంగా సీఎం నివాళులు అర్పించారు. దేశానికి ఫూలే అందించిన సేవలను స్మరించుకున్నారు. కుల వివక్షకు వ్యతిరేకంగా, సమ సమాజం కోసం పోరాడిన బహుజన తత్త్వవేత్త, సామాజిక దార్శనికుడు మహాత్మా జ్యోతిబా ఫూలే అని కేసీఆర్​ అభివర్ణించారు.

వర్ణ వివక్షను రూపుమాపేందుకు, దళిత, బహుజన మహిళా వర్గాల అభ్యున్నతి కోసం ఫూలే ఆచరించిన కార్యాచరణ మహోన్నతమైందని సీఎం వ్యాఖ్యానించారు. ఆరున్నరేళ్ల తెలంగాణ స్వయం పాలనా ప్రక్రియ ఫూలే వంటి మహనీయుల స్ఫూర్తితోనే కొనసాగుతోందన్న సీఎం.. కుల వృత్తులకు సామాజిక గౌరవం, ఆర్థిక గౌరవాన్ని పెంపొందించేలా అనేక కార్యక్రమాలు చేపట్టినట్లు వివరించారు. విద్య, సమానత్వం ద్వారానే సామాజిక, ఆర్థిక సమున్నతికి బాటలు పడతాయన్న ఫూలే ఆలోచనా విధానాన్నే తెలంగాణ ప్రభుత్వం అమలుచేస్తోందని వివరించారు.

సత్ఫలితాలు..

ఈ సందర్భంగా మహాత్మా జ్యోతిబా ఫూలే విదేశీ విద్యానిధి పేరిట విదేశీ విద్యను ప్రభుత్వ ఖర్చుతో బడుగు, బలహీన వర్గాలకు ప్రభుత్వం అందిస్తోందని ముఖ్యమంత్రి గుర్తు చేశారు. బాల్య వివాహాలను కట్టడి చేసేందుకు ప్రభుత్వం అమలు చేస్తున్న పథకాలు సత్ఫలితాలనిస్తున్నాయన్నారు. బీసీలు, ఎంబీసీల ఆత్మగౌరవం ఇనుమడించేలా హైదరాబాద్​లో విలువైన స్థలాలను కేటాయించి ఆత్మగౌరవ భవనాల నిర్మాణం చేపట్టినట్లు వివరించారు.